ბარბარა ტაკმანი

ბარბარა ვერტჰაიმ ტაკმანი (ინგლ. Barbara Wertheim Tuchman; დ. 30 ღურთუთა, 1912, ნიუ-იორკი, ნიუ-იორკი, ააშ — ღ. 6 ფურთუთა, 1989, გრინვიჩი, კონექტიკუტი, ააშ) — ამერიკალი ჭარუ, ისტორიკოსი დო ჟურნალისტი. შინელი რე წინგეფით: მარაშინათუთაშ ანჯარეფი (1962) დო სტილუელი დო ამერიკაშ ჩინური გუნამორსა, 1911–45 (1971). ჸათე ნახანდეფიშ გეშა ჟირშა მიპალუ პულიცერიშ პრემია 1963 დო 1972 წანეფს.

ბარბარა ტაკმანი
დაბადებაშ თარიღი:	30 ღურთუთა, 1912
დაბადებაშ აბანი:	ნიუ-იორკი, ნიუ-იორკი, ააშ
ღურაშ თარიღი:	ფურთუთა 6, 1989 (77 წანერი)
ღურაშ აბანი:	გრინვიჩი, კონექტიკუტი, ააშ
ერუანობა:	ამერიკალი
საქვარუა:	ჭარუ, ისტორიკოსი, ჟურნალისტი
პერიოდი :	1938–1988
Magnum opus:	მარაშინათუთაშ ანჯარეფი (1962) სტილუელი დო ამერიკაშ ჩინური გუნამორსა, 1911–45 (1971)
ჟანრი:	ისტორია
ნინა:	ინგლისური ნინა
ჯილდოეფი:	პულიცერიშ პრემია (1963, 1972) სენტ-ლუისიშ ლიტერატურული პრემია (1971) ერუანული წინგიშ პრემია (1980) ჯეფერსონიშ ლექცია (1980) ამერიკაშ ხელუანობეფიშ დო მენცარობეფიშ აკადემიაშ მაკათური (1978)

დებადჷ ამერიკალი ბანკირიშ მორის ვერტჰაიმიშ დო თიში ალმასქუშ ალმა მორგენტაუშ ფანიას. გურაფულენდჷ ისტორიას დო ლიტერატურას რედკლიფიშ კოლეჯის, ნამუთ გათუ 1933 წანას. გურაფაშ თებაშ უკულ ბარბარა ტაკმანი მუშენდჷ ჟურნალისტო. მაჟირა მოსოფელიშ ლჷმაშ ბორჯის მუშენდჷ ოურდუმე ინფორმაციეფიშ ოფისის.

ბარბარა ტაკმანის პოპულარობა მოუღჷ წინგიქ მარაშინათუთაშ ანჯარეფი, ნამუქჷთ 1962 წანას გიშართჷ. წინგის ეჭარილი რე მაართა მოსოფელიშ ლჷმაშ ორდოიანი პერიოდი. ტაკმანიშ შხვა ნახანდეფიშე ეიოშანალი რე: თინგალი ყორში: მოსოფელიშ პორტრეტი ლჷმაშ დოჭყაფაშა, 1890–1914 (1966), სტილუელი დო ამერიკაშ ჩინური გუნამორსა, 1911–45 (1971), ნაჭარეფი ჩინეთიშე (1972), შორიში სარკე: უბადო მავითაანთხა ოშწანურა (1978)

პულიცერიშ პრემიაშ მოხ ტაკმანი რდჷ სენტ-ლუისიშ ლიტერატურული პრემიაშ დო ერუანული წინგიშ პრემიაშ ლაურეატი. 1979 წანას ტაკმანიქ გიშაგორილქ იჸუ ამერიკაშ ხელუანობეფიშ დო ლიტერატურაშ აკადემიაშ მაართა ოსური პრეზიდენტო. ბარბარა ტაკმანი ლექციეფს კითხულენდჷ ჰარვარდიშ უნივერსიტეტის დო კალიფორნიაშ უნივერსიტეტის.

გიშნაგორა ნახანდეფი

• დინაფილი ბრიტანული პოლიტიკა: ბრიტანეთი დო ესპანეთი 1700 წანაშე (1938)
• ბიბლია დო ყამა: ბრიტანეთი დო პალესტინა ბრონზეშ ეპოქაშე ბალფურიშა (1956)
• ციმერმანიშ ტელეგრამა: ამერიკა მიშმურს ლჷმაშა, 1917 - 1918 (1958)
• მარაშინათუთაშ ანჯარეფი (1962)
• თინგალი ყორში: მოსოფელიშ პორტრეტი ლჷმაშ დოჭყაფაშა, 1890–1914 (1966)
• სტილუელი დო ამერიკაშ ჩინური გუნამორსა, 1911–45 (1971)
• ნაჭარეფი ჩინეთიშე (1972)
• შორიში სარკე: უბადო მავითაანთხა ოშწანურა (1978)
• ისტორიაშ პრაქტიკა: გიშნაგორა ესეეფი (1981)
• სიშერაშ მარში: ტროაშე ვიეტნამშა (1984)
• მაართა სალუტი: ამერიკაშ რევოლუცია (1988)

ლიტერატურა

• ენციკლოპედია ბრიტანიკა