ზუმი

ზუმი — ოფუტე საქორთუოს, სამარგალო-ჟიმოლენი შონეშ აკანიშ ჩხოროწყუშ მუნიციპალიტეტის, წყარმალუ ხობწყარიშ მარძგვანი წყარპიჯის, სანაკი-წალენჯიხაშ შარაშ 52-ა კმ-შ გინართუს ოფუტე ხაბუმეშე ხუთ კილომეტრის, ზუღაშ დონეშე 342 მეტრაშ სიმაღალაშ რზენილი გაბარს. რაიონიშ ცენტრი — დაბა ჩხოროწყუშე დოშორაფილი რე 9 კმ-ით. 2014 წანაშ ეჭარუაშ მუნაჩემეფით ოფუტეს ოხორანს 995 კოჩი.

ოფუტე
ზუმი
ქიანა	საქორთუო
აკანი	სამარგალო-ჟიმოლენი შონე
მუნიციპალიტეტი	ჩხოროწყუშ მუნიციპალიტეტი
მახორობა	995 კოჩი 2014

ზუმი ალაზჷმაფათ ახალი ოფუტე რე, სოდეთ უმოსო იმერეთიშე დო თუდოლენ სამარგალოშე გაკულაკებას რტებულ მემამულეეფიშ მონძეეფი ოხორანა. ომძღჷ ოფუტეეფი: ხაბუმე, მუხური, ნაკიფუ, ულურია.

ტოპონიმიკა

• ბარცხონა, აბანი, ქვერხამი (ჩირგვნარი) ვე რე.
• ლოშქუა, აბანი.
• ოფერებენე, აბანი.
• ჯანაშური, აბანი. თაქ ჯვეშო ჯანაშურიშ ჯიშიშ ბინეხი ჸოფე მეშქუმალირი მაღლარშა, ჩეშმანი ტყა ჸოფე თხუმუში, ხვიმაში დო უშქურიში.
• ნაგიდუ, აბანი. თაქ ჯვეშო ოხვამე რდჷ. ლემონჯავეფიშ ჯინჯი ხატი ჸოფე თაქი. ლემონჯავეფი თაქ თერდობას (ქორთულო „თევდორობა“) გინნოგაფუენა დღახუს. ლემონჯავეფიშ არძა ფანიაშ მაკათური ნოშაყარუე თაქი დღახუს. ნოჸვილუენა ხოჯის დო ნორთუენა ხორცის.
• ოყარყალე, აბანი. წყარი გინოხვილუე წოხლე, გორდეფიშ ოყაყალუ ჸოფე.
• ნაჭკიდუ, აბანი.
• ნაღუმუ, აბანი.
• ნაისირუ, აბანი.
• ჭყონარი, აბანი. თაქ ჯვეშო ოხვამე ხოლო ჸოფე.
• კეჭნარი, აბანი. ქუალონი აბანი ჸოფე, ხვალე ჭილი ნოჩვე ჯვეშო.
• წისქვილკარი, აბანი.
• უჩა გა, აბანი (ქორთულო „შავი სერი“).
• ფიჩხონა, აბანი.
• ცხვარკალი, აბანი.
• ნანდუ, აბანი.
• ჸურუმი, აბანი.
• ნაშენი, აბანი. თაქ ჯვეშო პატჷნეფიშ ზოჯუათ ლემონჯავეფს ბინეხი დო ხილი გაუშენებუნა. ლემონჯეფი თაქ მოჸონაფილ მუნაწიის ედომუშამო პატჷნს ნორზებუენა, მანგიორი პატჷნეფი ტყას ჸურზენიშ წილუაშ პიანს მინოჩამუენა.
• ობრული, აბანი.
• საბეკი, აბანი. თაქ მარულა ნოჩქვენა ჯვეშო. ჸოფე ცხენეფიშ ორულე აბანი, ცხენეფიშ ოდამორჩილე დო ოგაზარხულე დარენჯი ჸოფე.
• დობერა, აბ. თაქ ჭვიტილურიშ დო პანეშიშ მაღლარი ჸოფე გაშენებული.
• გა, სუკი.
• ენწერი, აბანი.
• საშორგაიო, შორგაიეფიშ გვარიშ განობა.წოხლე შორგაიეფი ჸოფენა, ასე - შორგაძეეფი.
• დობერონი, დიდი დობერა, აბანი. თაქ წოხლე ბინეხი ნოჩვე.
• საგელანტიო, გელანტიეფიშ გვარიშ განობა.
• ოლებე, ლებიაშ ჯაშ აბანი ჸოფე, წინდამი, ტყალამი აბანი, უჯვეშაშ ბორჯიშე თაქ ლეტას, ლეკის ენოჭოფუენა ტყებიშ ოღაფალო.
• ნოხორიი, აბანი.
• ჸვანაღალი, ღალი. ამდღა სქირაფილი აბანი რე.
• ზუმი, ზჷმი, (ზჷმუა, გოზჷმუა), ოფუტე. ჯვეშ გინოჩამათ, ოფუტეშა მოულირი მაზჷმალეფი თეში მედინაფენა, ზჷმუა ვაჭიშაფუნა.
• სალემონჯო, ლემონჯეფიშ გვარიშ განობა. გინოჩამათ, ლემონჯეფს თაქ მოურთუმუნა შონეშე.
• ფათუში გა, გა. ჯვეშო თაქ მიდგარენი ფათუ ნოხორუე.
• ტები (ტყა), აბ. ფშხირი, ტყალამი, ჭყენჭყონა აბანი ჸოფე წოხლე.
• ნადიხუ, აბ.
• ოხვამე, აბ. ამდღა ოხვამე ვეგედგჷ.
• ნაოხვამუ, ლემონჯეფიშ უჯვეშაში ჯინჯი ხატი.
• ნაურიაში ტობა, აბ. ნაურია გახარიაშ ტობა ხობწყარს. ამდღა აკოფშაფილი რე.
• დღვებუში, ძალამ ჭყენჭყონა დო უგუული აბანი.
• ოხვამეში მართუ, აბანი. ამდღა ვართ თექ ვართ ოხვამე რე, ვართ მართუ, ხობწყარქ კალაპოტი დითირუ.
• ჭითა ტკილი, აბანი. თაურეშე ჭითა ტკილი მინოღვენა ჸვანფიშ დარღვაფალო. გინოჩამათ, თურქობაშ ბორჯის ჭყვადილ კათაშ ზისხირით რენია გოჟიჟინაფილი თე ტკილი.
• ძაძუში ტობა, ტობა ხობწყარს, ნამუთ ნორხველუე ძაძუ ფირცხალავას.
• კვარაცხელიაში ტობა, შკვითი ჯიმა კვარაცხელიაშ ოხორუ წალენჯიხას თჷრიშ სვიმონს მოუჯალაგუ. თეურეშე ჯიალეფს თაქ მოურთუმუნა დო თე ტობაშ პიჯის დოხორელენა.
• დავითიაში ჭალე, აბ.
• საკვარაცხელიო, კვარაცხელიეფიშ გვარიშ განობა.
• ხობწყარ პიჯი, აბანი, ჭალე.
• საგელანტიო, გელანტიეფიშ გვარიშ განობა.
• კადუში ნოხორიი, ოფუტეშ ცენტრი.
• საშოგრადო, აბანი.
• საკაკარი, აბანი.
• სანაჭყეპიო, ნაჭყეპიეფიშ გვარიშ განობა.
• ძაკაშ ნოხორიი, აბანი. ძაკა ხვადაგიანიშ ნოხორი, მინოსინჯალაფირი ჸოფე შონეშე.
• საკირცხალიო, კირცხალიეფიშ გვარიშ განობა.
• ჭუბიში, აბანი. თაქ რე ლაგვანეფიშ მუნაფორალი დიხა.
• ნანწარუ, გჷნამწარი, პატჷნიშ ანაორხებუ აბანი.
• ნახაჯუ (ქორთულო ნაცერცვალი), აბანი.
• ნაჩხვერუ, ნაღუმოლი.
• ნაქობალი, თაქ ჯვეშ ბორჯის ქობალს ნოთასუენა.
• ჭყონა, აბანი.
• ნოხორი, აბანი.
• ნაოსხაპუ, აბანი.
• ოშაყარუ, აბანი. თაქ ჯვეშო ჯარალუა, შაყარუა ნოჩქვენა.
• ნაჯიხუ, აბანი. სერგიეფიშ ჯიხა გინოდგვე თაქი.
• ნაცაცხუ, აბანი. ჯვეშო ცაცხვი გინოჩვე, სოდეთ ხვამა ნოჩქვენა, თელი ოფუტე ნოშაყარუე თაქი.
• მაქსიმეში ნოხორი, აბანი.
• აგუძერა, აბ.
• კიწიშ ნადიხუ, აბანი.
• გითნახვამა, აბანი.
• ცირამუაშ ნადოხორუ, აბანი. ცირამუეფიშ გვარიშ ჯვეში ნოხორი. ამდღა ცირამუეფი ვახორანა თაქი.
• ნატურუ, აბანი.
• ნაცაცხვუ, აბანი, თაქ ლემონჯეფს ხვამა ნოჩქვენა.
• 'ენწერიბანი.
• ნაკლასუ, აბანი. თაქ ეუგაფუნა მაართა ჯაშ ართკლასამი ოგურაფუ.
• ნადუქანუ, თაქ ოვაჭრებელი აბანი ჸოფე ჯვეშო.
• ნაქირონა, აბანი. ქირაშა ნომუშებუენა თაქ დიხას მინჯეეფი. ფშხირას ჸოფე ქირაშ გეშა ნირზეფი, კოჩი ხოლო ჸოფე ნავილა.
• ბარცხენი, აბანი.
• ნაოსხაპუ, აბანი.
• ნახარდანუ, აბანი.
• ნატებარი, აბანი.
• თხომურონი, თაქ ჯვეშო თხომუშ ტყა ნოჩვე ედომუშამო.

ლიტერატურა

გივი ელიავა, გივი ფარულავა, გრიგოლ შენგელია, ჩხოროწყუს რაიონის ტოპონიმიკის კატალოგი, 1983 წანა.