ლავრენტი ბერია (დ. 29 მელახი, 1899 ღ. 23 ქირსეთუთა, 1953) ― რდჷ სხუნუეფიშ რსხუშ პოლიტიკური დო ოჯარალე მოღალე, სხუნუეფიშ რსხუშ მარშალი (1953 წანას მიდუღეს თე წოდება). 1938-1945 წანეფს რდჷ დსოკ-იშ თარი. ოხოლჷდჷ სტალინიშ უხოლაშ ქართას დო ოკათუდჷ სტალინიშ რეპრესიეფს, მარა თეწკჷმა ართო უკანონეთ რეპრესირებულეფიშ რეაბილიტიაციას ხოლო უნწყჷნდჷ ხეს. კურირენდჷ თხილუაშ წარმებაშ დუდ ჸალეფს დო ატომური ანჯარიშ წარმებას.

ლავრენტი ბერია
ლავრენტი ბერია
სსრრ-შ კპ-შ ცკ-შ პოლიტბიუროშ (პრეზიდიუმიშ) მაკათური
პოსტის გერინაშ ბორჯი
18 მელახი, 1946 – 7 კვირკვე, 1953

პოსტის გერინაშ ბორჯი
5 მელახი – 26 მანგი, 1953
პრემიერ-მინისტრიგიორგი მალენკოვი
წიმოხონისერგეი კრუგლოვი
მონძესერგეი კრუგლოვი

პოსტის გერინაშ ბორჯი
16 მესი, 1944 – 4 ეკენია, 1945
მონძეპოსტიქ გეუქვუ

პოსტის გერინაშ ბორჯი
25 გერგობათუთა, 1938 – 30 დეკემბერი, 1945
პრემიერ-მინისტრივიაჩესლავ მოლოტოვი
იოსებ სტალინი
წიმოხონინიკოლოზ იოჟოვი
მონძესერგეი კრუგლოვი

პოსტის გერინაშ ბორჯი
7 გჷმათუთა, 1932 – 23 პირელი, 1937
წიმოხონიივანე ორახელაშვილი
მონძეპოსტიქ გეუქვუ

დუნაბადი29 მელახი, 1899
მერხეული, სოხუმიშ ოკრუგი, ქუთეშიშ გუბერნია, რუსეთიშ იმპერია
ნაღურაქირსეთუთა 23, 1953 (54 წანერი)
მოსკოვი, სსრრ
ერუანობამარგალურ წჷმოულობაშ ქორთუ
მუმაპავლე ხუხაშ სქი ბერია
ნანამართა ბესარიონიშ ცირა ჯაყელი
ალმასქუნინო თეიმურაზიშ ცირა გეგეჭკორი
სქუალეფიქომოლსქუა: სერგო
გონათაფაბაქოშ პოლიტექნიკური ინსტიტუტი

სტალინიშ ღურაშ უკული, მირდჷ ბერიაშ პილიტიკურ როლქ. ბერიაქ ქჷდიჭჸჷ ლიბერალიზაციაშ კუნტა კამპანია, მარა მალას ოჭოფეს დო ქჷგიაბრალეს ნწყიმარალა, ხეშუულობაშ უზურპაციაშ ცადა დო შხვა ბრელი უბადო საქვარი. სსრრ-იშ უმაღალაში სასამართოშ გინოჭყვადილაფათ, 1953 წანაშ ქირსეთუთას ლავრენტი ბერია გორხვეს (მუში სქუაშ, სერგო ბერიაშ ვერსიათ ბერია, ჭოფუაშ უკული, ხეთე გორხვეს 1953 წანაშ კვირკვეს, მარა თე ინფორმაცია ვედასურებჷ დოკუმენტეფით, ნამუთ დიო ხოლო თელას ვა რე გონწყჷმილი).

კანკალე ფირქენს, ნამდა ბერია რდუა სტალინიშ ღურაშა გამამინჯე. 1993 წანას გჷშაშქუმალირი, ვიაჩესლავ მოლოტოვიშ მემუარეფს ჭარჷ, მუჭოთ ბერიას ინუფუცქინაფჷ მოლოტოვშა: „თინა მა დებთხინევა“.

ბიოგრაფია რედაქტირაფა

დებადჷ სოხუმიშ რაიონიშ ოფუტე მერხეულს, გაჭირებული ყაზაყიშ – პავლე ხულაშ სქი ბერიაშ (1872-1922) ფანიას. 1915 წანას გათუ სოხუმიშ უმაღალაში ტექნიკური ოგურაფუ, თეშ უკული ლავრენტიქ მიდართჷ ბაქოშა დო გემიშართჷ ბაქოშ ოშქაშე მექანიკურ ტექნიკურ ოგურაფუშა. 17 წანაშე ეთმიჯუმუანდჷ დიდას დო მუშ ჸუნგა დას, ნამუეფქჷთ გეგნორთეს ბაქოშა.

1917 წანაშ მელახის ბერიაქ ბაქოშ ოგურაფუს ქჷდარცხუ ბოლშევიკური ორგანიზაციაშ ჸა. 1919 წანაშ მელახშე აზერბაიჯანს სხუნუეფიშ ხეშუულობაშ დორსხუაფაშახ (1920 წანაშ პირელი) ბერია ხემანჯღვერენდჷ ტექნიკოსეფიშ კანონგალე ორგანიზაციას. 1919 წანას ლავრენტი ბერიაქ ჯგირო გათუ ტექნიკური ოგურაფუ დო გეჭოფჷ ტექნიკოსიშ დიპლომი. საქორთუოშ მენშევიკური ხეშუულობაშ წჷმემარინჯალაშ გურშენი ოჭოფეს დო ქჷდახუნუეს ქუთეშიშ ჯიხას. 1920 წანაშ მარაშინათუთას, პოლიტიკური არესტანტეფიშ ბუნტიშ მონწყუალაშ უკული გინორაჸეს საქორთუო ხურგიშ გალე.

თეშ უკული ბერიაქ დირთჷ ბაქოშა დო ოგურაფშა გემიშართჷ ბაქოშ პოლიტექნიკურ ინსტიტუტშა. 1921 წანას სხუნუეფიშ რსხუშ კომუნისტურ პარტიაქ ბერია გუტუ ჩეკისტურ სამუშაშა. 1921-შე 1931 წანაშა ბერია მუშენდჷ დაზვერვაშ დო კონტრდაზვერვაშ ხემანჯღვერულ პოსტეფს.

ჩეკას დო გრუს მუშენდჷნჷ თეში ბერია აქტიურო მონაწილენდჷ მენშევიკეფიშ, დაშნაკეფიშ, მესავატისტეფიშ, ტროცკისტეფიშ და ხურგიშგალენ აგენტურაწკჷმა დო შხვა კათაწკჷმა ლჷმას, ნამუთ ორცილჷდეს ბოლშევიკეფს. 1931 წანაშ გერგობათუთას ბერია გინიჸუნეს პარტიულ სამუშაშა - გიშაგორილი რდჷ საქორთუოშ კომუნისტურ პარტიაშ ცენტრალური კომიტეტიშ დუდმახვენჯო დო მოლენ-კავკაციაშ კრაიკომო.

1938 წანაშახ ბერია კავკაციას მუშენდჷ, მარა უკული გეგნიჸუნეს მოსკოვშა. 1938 წანაშ 22 მარაშინათუთას ბერია ქჷდარინეს ნ.ი.ეჟოვიშ (სსრრ-იშ დინოხოლენი საქვარეფიშ ოკათე კომისარიატიშ) დუდ გამათ. 29 ეკენიაშე რე დსოკ-იშ უშკურანჯალაშ დუდ ორთინაფუშ თარი. 25 გერგობათუთაშე თირანს ეჟოვს ოკათე კომისარიშ პოსტის. 1939 წანაშ 22 მელახშე რე პოლიტბიუროშ მახულუობაშ კანდიდატი. მაჟია მოსოფელიშ ლჷმაშ წანეფს, 1941 წანაშ 30 კვირკვეშე რე დუდიშთხილუაშ სახენწჷფო კომიტეტიშ მახოლჷ დო 1944 წანაშ 16 მესიშე დუდიშთხილუაშ სახენწჷფო კომიტეტიშ დუდმახვენჯიშ სეკრეტარი. ბერია ხოლო რდჷ ურიული ანტიფაშისტური კომიტეტიშ ინიციატორი დო კურატორი.

1946 წანაშ 18 მელახშე ბერიაქ გჷნირთჷ პოლიტბიუროშ მაკათურო, ანუ მიშმურს ქიანაშ უმაღალაში თარეფიშ ერკებულშა. სსრრ-იშ უმაღალაში სხუნუშ 1943 წანაშ 30 ეკენიაშ ზოჯუთ ქჷმეჩეს სოციალისტურ ხანდაშ გერგეზიშ წოდება.

1945 წანაშ 9 კვირკვეს, ლავრენტი ბერიას ქჷმეჩეს სხუნუეფიშ რსხუშ მარშალიშ წოდება. 1949 წანას ქჷმეჩეს სტალინიშ პრემია „ატომური ენერგიაშ წარმებაშ დო ატომური ანჯარიშ გამორსაშენი.“

ფაქტეფი რედაქტირაფა

ბერიას მიკაჭარანა ფრაზას: „მილიონეფით ვაჸვილუნქჷნ თიმწკჷმა, კათას იდეეფი ურჩქინდუ.“ ბერიას გითმიაბრალენა, სექსუალური მანიაკი რდუა დო მიკაჭარანა მიარე სადო-სექსუალურ აქტეფს.

ღურა რედაქტირაფა

ნიკიტა ხრუშჩოვქ დო შხვეფქ ბერიას ქჷგიაბრალეს მიარე უბადო საქვარი დო გორხვეს 1953 წანაშ 23 ქირსეთუთას.

რესურსეფი ინტერნეტის რედაქტირაფა