ალიო ქობალია
ალიო ქობალია (დ. 1927 წ. ღ. 2006 წ.) — დებადჷ ჩხოროწყუშ რაიონიშ ოფუტე ნაფიჩხუს, ლექობალეშ განობას. გაათუ სოხუმიშ პედაგოგიური ინსტიტუტიშ ფილოლოგიაშ ფაკულტეტი. 1952–1992 წწ. ოხორანდჷ დო მოღალენდჷ აფხაზეთის, რდჷ ოჩამჩირეშ რაიონული გაზეთიშ რედაქტორიშ გამაკოჩი, ჭარჷნდჷ ლერსეფს, თხობელუეფს, რომანეფს. რე ავტორი სოხუმს გჷშაშქუმალირი 13 პოეტური კათელიშ: „თეთრი ბილიკი“, „ნისლი ჭალაში“, „ველის ყვავილი“, „წყნარი თოვლი“, „ნაღვლიანი დღე“, „ცისფერი კვამლი“ დო შხვა. გოწოს გერმანიას გიშეშქჷ ალიო ქობალიაშ 1600 ხასჷლამი ლექსიკოგრაფიული ნახანდიქ "მეგრულ–ქართული ლექსიკონი" ჟირი ტომო, გიშმაშქუმალარიე შტუტგარტიშ უნივერსიტეტიშ პროფესორი, ქართველოლოგი, ლაზური დო მარგალური ნინეფიშ სპეციალისტი ვოლფგანგ ფოიერშტაინი. ლერსიკონშა მიშართჷ 97000 ლექსიკურ ართურქ დო ზიტყვა–სტატიაქ. გჷშაშქუმალარო გახაზჷრებული რე დო სპონსორს ელჷ მუში ტოპონიმური, ონომასტიკური, ეტიმოლოგიური, ფრაზეოლოგიური ლერსიკონეფი, ეთნოგრაფიული ნახანდეფი. ქვერსემშანულამი რე მუში ისტორიოგრაფიული, მითოლოგიური, კოსმოგონიური კილაგორუეფი, პუბლიცისტური დო კრიტიკული ჭარილეფი. მუსხირენი ევროპული ნინაწკჷმა ართო ალიოს ტომბას უჩქუდჷ ქორთული, მარგალური, ლაზური ნინეფი. თაშნეშე, გურგაჩამალი კილაგორუეფი უღჷ ქართველური ნინეფიშ ალაზიმაფაშ ლექსიკოლოგიაშ დარგისჷთ. ალიო ქობალიაშ ქორთული დო, გჷშაკერძაფილო მარგალური ლერსეფი დიდი პოპულარობათ რგებაფულენდჷ აფხაზეთის დო სამარგალოშ ლიტერატურულ წირეეფს. რინა გასურჷ ზუგდიდც, თხოზინალობას, დასაფულებური რე მანცხვარკარს.
