ბარცხვინია

ბარცხვინია თაშნეშე ბარცხინია, ბარცხი, ბარწკვინია, ქოცხოცხო, მაწკვინტია (Ruscus) (ქორთ. თაგვისარა) — ჩანარეფიშ გვარი ძარხუხუშობურეფიშ ფანიაშე. ჟირჸუდეამი, იროწვანე ღოღაიაჯინჯამი ბართოდიარეეფი რე. ბარცხვინიაშ გუმნაღელეფი ფილოკლადიუმეფო აფუ გჷნოქიმინელი, კინე მუ ფურცელი — ძალამ ჭიფე დო ქერქლიშობური რე, ინოხე ფილოკლადიუმიშ ჯინჯის. ბარცხვინია 5-6 გვარობა გოფაჩილი რე აზორიშ, კანარიშ დო მადეირაშ კოკეფს, თაშნეშე ბჟადალ ევროპას, ყირიმს დო კავკაციას. საქორთუოს შეთმეფხვადჷნა 2 გვარობა. ბარცხვინია ჩანს გვალაშ ტყაპიჯეფს, ბართონეფს, ქუამ დო კირდეამი ფერდეფს. კანკალეშა აკმოქიმინჷნს რაყატყას. არძა გვარობას დეკორატიულ ჩანარო გჷმირინუანა. კოლხური ბარცხვინიაშ (Ruscus colchicus) გუმნაღელი იჭკომე.

ლიტერატურა

• ქსე, ტ. 4, გვ. 558, თბ., 1979