დერმატოლოგია
დერმატოლოგია (ჯვ. ბერძ. δέρματος (dermatos) - კანი დო -λογία -logia (მონძღვარუა) რე მედიცინაშ დარგი, ნამუთ გურაფულენს კანს დო თიშ ლახარეფს. თეხანური დერმატოლოგია ირკვიენს კანიშ შხვადოშხვა პათოლოგიეფს, ეტიოლოგიას, დიაგნოსტიკას, პროფილაქტიკას დო კურნალობაშ მეთოდეფს. 2002 წანას, ევროპაშ დერმატო-ვენეროლოგეფიშ აკადემიაქ დადგინჷ დერმატოლოგიაშ სუბ-დისციპლინეფი: ანდროლოგია, ფლებოლოგია, მიკოლოგია, ჰისტოპათოლოგია, ალერგოლოგია, იმუნოლოგია, პედიატრიული დერმატოლოგია, დერმატოლოგიური ქირურგია, ესთეტიკური მედიცინა, კოსმეტოლოგია. კანიშ ლახარეფიშ რკვიებაშ კლინიკური მეთოდეფიწკჷმა ართო გიმირინუაფუ ჰისტოლოგიური, მიკრობიოლოგიური, ვირუსოლოგიური, ბიოქიმიური, ჰისტოქიმიური, ელექტრონულ -მიკროსკოპული, ექსპერიმენტული, სტატისტიკური დო შხვა მეთოდეფი. დერმატოლოგიაშ ხოლოშიანი ომედიცინე დისციპლინეფიე: ვენეროლოგია, თერაპია, პედიატრია, ენდოკრინოლოგია, გინეკოლოგია, ნევროლოგია, ოფთალმოლოგია დო შხვა.
დერმატოლოგიაშ ისტორია ანტიკური პერიოდიშე იჭყაფჷ. ჩინურ მანუსკრიპტეფს დო ეგვიპტურ პაპირუსეფს შეთმოფხვადუთჷ ინფორმაციეფს დერმატოლოგიური ლახარეფიშ დო თინეფიშ სქილადაფაშ პრიმიტიული მეთოდეფიშ გეშა. ართ-ართი მაართა მენცარი, ნამუქჷთ ეჭარჷ შხვადოშხვა დერმატოლოგიური ლახარეფი რდჷ ჯვეში ბერძენი ექიმი დო ფილოსოფოსი ჰიპოკრატე.