ვიაჩესლავ მოლოტოვი
ვიაჩესლავ მიხეილიშ ნძე მოლოტოვი (რუს. Вячеслав Михайлович Молотов, ნანდული გვარი: სკრიაბინი, რუს. Скрябин) (დ. 9 მელახი [ ჯვ. სტ. 25 ქირსეთუთა] 1890, კუკარკა, ვიატკაშ გუბერნია (ამდღ. კიროვიშ ოლქი), რუსეთიშ იმპერია — ღ. 8 გერგობათუთა 1986, მოსკოვი) — სხუნუეფიშ რსხუშ თარობაშ დუდი დო გალენი საქვარეფიშ მინისტრი. 1939 წანაშ 23 მარაშნათუთას ხე მაჭარჷ მოსოფელიშ ართ-ართ არძაშ უმოს ჩინებული ზებაშ ხეკირილობას, მოლოტოვ-რიბენტროპიშ პაქტის.
ბიოგრაფია
რედაქტირაფა1902 წანაშე გურაფლენდჷ ყაზანიშ რეალურ ოგურაფუს. თექი იჩინებაფუანს მარქსიზმიშ იდეოლოგიას. 1906 წანაშე რდჷ რსდმპ მაკათური დო ოგურაფუშ ულეგალე რევოლუციური ორგანიზაციაშ დორსხუაფაშ ართ-ართი ინიციატორი. 1909 წანას დახუნეს დო გინახორეს ვოლოგდას. 1911 წანას უტენა. თიმ წანას ოგურაფალო მეურს სანქტ-პეტერბურგიშ პოლიტექნიკურ ინსტიტუტშა. 1912–1913 წანეფს მუშრნდჷ გაზეთ „პრავდაშ“ რედაქციას მელამოსეთ. 1915 წანას კინ დახუნეს დო გინახორეს ირკუტსკიშ გუბერნიაშა, სოჸურეშეთ ინტჷ 1916 წანას. თიმ წანას გინირთჷ რსდმპ ცეკაშ- რუსეთიშ ბიუროშ მაკათურო. მაართა მოსოფელიშ ლჷმაშ ბორჯის ირფელნერო არიდენდჷ დუს ოურდუმე სამუშას. 1915 წანას ეჭოფუნს პარტიულ სალაჸაფო ჯოხოს Молотов-ს.
გჷმათუთაშ რევოლუციაშ უკული დარინეს საკათო წარმებაშ ოორუეშ ოლქიშ სხუნუეფიშ დუდმახვენჯო. 1919 წანაშე მუშენდჷ რკპ(ბ) ცეკა-შ რწუმებულო ვოლგაშპიჯის. 1920 წანაშ ეკენიაშე მუშენდჷ რკპ(ბ) დონეცკიშ საგუბერნიე კომიტეტიშ მელამოსეთ. 1920 წანაშ გერგობათუთაშე 1921 წანაშ მელახშა რდჷ უკრაინაშ კომპარტიაშ ცეკა-შ მელამოსე. 1921 წანაშ მელახიშე 1930 წანაშ 31 ქირსეთუთაშა მიორსხუალი კომუნისტური პარტიაშ ცეკა-შ მელამოსე რდჷ. 1921-27 წანეფს ცეკა-შ პრეზიდიუმიშ მაკათურობაშ კანდიდატი, 1929-31 წანეფს მაკათური. 1928–1929 წანეფს რდჷ მოსკოვიშ ნოღაკომიშ მაართა მელამოსე. 1930 წანაშ 19 ქირსეთუთაშე სსრრ-შ საკათო კომისარეფიშ რსხუშ დუდმახვენჯი. 1937–1938 წანეფს რდჷ დიდი წიმინდუაშ ართ-ართი აქტიური მაკათური დო ორხვალეფიშ ერკებულეფიშ აკმადგინალი. 1939 წანაშ 3 მესიშე სსრრ-შ გალენი საქვარეფიშ კომისარი. 1946 წანაშ 19 მელახიშე სსრრ-შ მინისტრეფიშ სხუნუშ დუდმახვნჯიშ მაართა ალმახვენჯი. 1949 წანას მონწუმილქ იჸუ იფრელშე, თიში ფანიაქ რეპრესირებულქ იჸუ, მორო მუ ვადუხუნუაფნა. სტალინიშ ღურაშ უკული, 1953 წანაშე კინ დარინეს გალენ საქვარეფიშ მინისტრო. 1957 წანას დარინეს სსრრ საგარძახო დო რსულუფალებამ ელჩო მონღოლეთიშ რესპუბლიკას. 1963 წანას მეურს პენსიაშა. უმკუჯინუო თიშ, ნამდა რინას შქვითშა გინიღჷ მიოკარდიუმიშ ინფარქტი, დოდირთ მოხუცებულობაშა დო ღურჷ 96 წანაშ ხანშა.
რესურსები ინტერნეტში
რედაქტირაფა
