ვიქტორ ვაისკოპფი
ვიქტორ ფრედერიკ ვაისკოპფი (გერმ. Victor Frederick Weisskopf, დ. 19 ეკენია, 1908, ვენა, ავსტრია-უნგრეთიშ იმპერია — ღ. 22 პირელი, 2002, ნიუტონი, მასაჩუსეტსი, ააშ) — ამერიკალი ფიზიკოსი.
.svg){kind=small}
დებადჷ ვენას, ურიეფიშ ფანიას. გურაფულენდჷ გეტინგენიშ უნივერსიტეტის, სოდეთ თხილუ ოდოქტორე დისერტაცია ფიზიკას, 1931 წანას. 1930-იან წანეფს ამერიკაშა მიდართჷ დო თექ გაგინძორჷ ომენცარე კარიერა. ვაისკოპფიქ მიშეღჷ დიდი თია კვანტური თეორიაშ, გიშაკერზაფილო კვანტური ელექტროდინამიკაშ გოვითარაფაშა.
1937-1943 წანეფს ვაისკოპფი რდჷ როჩესტერიშ უნივერსიტეტიშ ფიზიკაშ პროფესორი. ჸათაქ თიქ ესთერ კონუელიწკჷმა ართო აკიმუშუ კონუელ-ვაისკოპფიშ თეორია, ნამუთ ეთმოჭარუნს ელექტრონეფიშ ჸარაფის გვერდოგამტარეფიშ დინახალე. ჸათე მეჭირინაფა რევოლუციური რდჷ დო უღუდჷ კაბეტი შანულობა კომპიუტერული ტექნოლოგიაშო.
მაჟირა მოსოფელიშ ლჷმაშ ბორჯის ოკათუდჷ მანჰეტენიშ პროექტის დო მუშენდჷ ლოს-ალამოსიშ ერუანული ლაბორატორიას.
მაჟირა მოსოფელიშ ლჷმაშ უკულ, ვაისკოპფიქ გინილჷ მასაჩუსეტსიშ ტექნოლოგიაშ ინსტიტუტიშა, სოდეთ გინირთჷ ფიზიკაშ დეპარტამენტიშ მადუდეთ. 1956 წანას, ვაისკოპფი რდჷ ფიზიკაშ მენცარობაშ რკვიებეფიშ კომიტეტიშ ართ-ართი დუმარსხუაფალი. 1961-1966 წანეფს ნინალენდჷ ბირთვული რკვიებეფიშ ევროპული ორგანიზაციაშ გენერალური-დირექტორო. 1976–1979 წანეფს რდჷ ამერიკაშ ხელუანობეფიშ დო მენცარობეფიშ აკადემიაშ პრეზიდენტი.
მუში ომენცარე კარიერაშ გოძვენას ვაისკოპფი მუშენდჷ მაქს ბორნი, უერნერ ჰეიზენბერგი, ერვინ შრედინგერი, ვოლფგანგ პაული, ნილს ბორი დო შხვა გიშარჩქინელი მენცარეფიწკჷმა. ვაისკოპფი ბრელშა რდჷ ნომინირაფილი ნობელიშ პრემიაშა, მარა პრემია დღას ვემუღებჷ.
ლიტერატურა
რედაქტირაფა- V. Stefan, ed. (1998). Physics and Society: Essays in Honor of Victor Frederick Weisskopf by the International Community of Physicists.
რესურსეფი ინტერნეტის
რედაქტირაფა- ვიქტორ ვაისკოპფი Encyclopedia.com-ის
- ვიქტორ ვაისკოპფი INSPIRE-HEP-ის