თოფური, სკაშ თოფური — ანდაღებული ოჭკომალი პროდუქტი. არძაშე შხირას რაგადანა ნატურალურ, ე.ი. სკაშ თოფურშენ, ნამუთ რე გემუანი, სიროფიშობური ნიფთიარობა, ნამუსჷთ პეულიშ ნექტარშე ვარ-და მანანაშე შაყარანს მოხანდე სკა, ჩიყვაყვის გინმამუშენს დო ოჭკომალო გჷმირინუანს; ბუკიშა მითოღალირი ნექტარიშე სკა ორთჷ აქტიურ ვენტილაციას დო ზედმეტი წყარი ჭიე-ჭიეთ იორქებუ, მუთმოხვადჷ რთული შანქარეფიშ ინვერსია. ათე პროცესის თოფურიშ მონდინაფა ჯოხო. საბოლათ თოფურს სქიდჷ 18-22% წყარი, უკაჭული შანქარეფი, ჯიმუეფი, ვიტამინეფი, არომატული, საღაფლა ნიფთიარობეფი დო შხვა, ნამუშ აკოდგინალუას დოჸუნს თოფურიშ ფიზიკური დო ქიმიური მუშობურობეფი. თიში ქიმიური აკოდგინალუა დოჸუნს ჩანარეფიშ გვარობას, კლიმატურ პიჯალეფს დო შხვა. თოფურიშ აკოდგინალუაშა მიშმურს 13-20% წყარი, 80%-შე უმოსი ნოშქერწყარეფი (გლუკოზა, ფრუქტოზა, საქაროზა, მალტოზა), 0,4% ცილა, 0,3% ტუტა, თაშნეშე ორგანული ბჟეფი, ფერმენტეფი, ასკორბინიშ ბჟე დო შხვ. თოფურს უღუ ანდანერი ოსქილადე, დამაკონსერაფალი, ფოკვაშ სოკოეფიშ სააწმარენჯო დო შხვა მუშობურობეფი.[1]

თოფური
სარანჯი თოფური
ვიდეო თოფურიშ გეშა

გოჭყაფაშ მეჯინათ თოფური შილებე ორდას მონო- ვარ-და პოლიფლორული. პირველს ორხველჷ ლაკაციაშ, ცხვაცხვიშ, ჭუბურიშ, ბჟამაჯინუშ ვარ-და შხვა ნამდგა ჩანარშე მენაღებჷ თოფური, მაჟირას — დოლოშ ანდანერი პეულიშე ვარ-და ტყაშ მათოფურე ნექტარშე მენაღებჷ თოფური. ნატურალურ თოფურს მუში გლუკოზაშ ვარ-და ფრუქტოზაშ მაღალი კონცენტრაციაშ გეშა ახასიათენს კრისტალიზაცია. თე პროცესი უწაიათ მეურს 13-14 °C ტემპერატურას. სკაშ თოფური შილებე ორდას სარანჯამი ვარ-და გიშაწირილი. მუჭოთ ართი, თეშ მაჟირა მაღალი ოჭკომური ღებათ დო სამკურნალე მუშობურობეფით გიშეგორუაფუ.[2] თიში მაღალი ოჭკომური ღება დო სამკურნალე მუშობურობეფი გჷთმითანჯუ ვა ხვალე ლექინას ასათვისაფალი შანქარეფიშ კაბეტი მუდანობათ, თაშნეშე ფიზიოლოგიურო რსულფასამი მინერალური ნიფთიარობეფიშ, ფერმენტეფიშ, ვიტამინეფიშ დო ანტიმიკრობული ნიფთიარობეფიშ აკოდგინალუათ. ნატურალური თოფური აჭყანიერენს ნიფთიარობეფიშ თირუას, უღჷ ბაქტერიოციდული, ანთებაშ სააწმარენჯო დო მატონიზაფალი მუშობურობა, აბიწორენს ნორშვეფიშ აკოდგინალუას, ჭკანტუნს ოჭკომალიშ მარცუაფალი სისტემაშ მუშობას, ასტიმულირენს დინოხოლენი ორგანოეფიშ დო იმუნური სისტემაშ მუშობას.[3]

თაშნეშე რე ხელუანური თოფური, ნამუსჷთ მუთუნნერი რსხუ ვაუღუ ნატურალურ თოფურწკჷმა. თის აწარმენა საქაროზაშ ინვერსიათ ლიმონიშ ბჟეშ გეძინათ. კანკალეშა გეთმუძინანა სინთეთიკურ არომატიზატორეფს. ხელუანური თოფური შილებე გჷმორინაფილ ორდას მუჭოთ ოჭკომალი ნიფთიარობა, მარა თის, ვაუღჷ მარგებელი დო სამკურნალე მუშობურობეფი. თოფურიშ ფალსიფიკაცია ფართოთ რე მოდვალირი. თოფურიშ ფალსიფიცირაფაშ არძაშე ლექინი მოხუჯა: შანქარიშ სიროპის გეთმუძინანა ძმარს დო საღაფლას; თეჯგურა „თოფურშა“ ჩაჩანური უჯოხონა.[4]

თოფურიშ ნერგვარობეფი:[5]

  • მესიშ თოფური
  • ცხვაცხვიშ თოფური
  • წიწიბიშ თოფური
  • ლაკაციაშ თოფური
  • ბჟამაჯინუშ თოფური
  • მანანაშ თოფური
  • რაფსიშ თოფური
  • ჭუბურიშ თოფური
  • ფათალოშ თოფური

გალერეარედაქტირაფა

რესურსეფი ინტერნეტისრედაქტირაფა

სქოლიორედაქტირაფა