კალიდასა

კალიდასა (IV-V ოო.) ინდოარი პოეტი დო დრამატურგი. გინოჩამაშ მეჯინათ, თინა დაბალი წჷმოულობაშ ჭკვერი კოჩი რდჷ. მარკვიალეფიშ ვარაუდით, მოღალენდჷ ინდურ კულტურაშ თ. გ. „ორქოშ ხანას“, გუპტეფიშ დინასტიაშ მაფაშ ჩანდრაგუპტა II ვიკრამადიტიაშ კარს. 30–შე უმოსი თხობელუაშე, ნამუსჷთ კალიდასას მიოჭარანან, მენცარული კრიტიკა თინა ორხველჷ ეპიკურ პოემეფს „რაგჰუშ მოდგამს“ („რაგჰუვანშა“) დო „ლჷმაშ ღორონთიშ კუმარაშ დაბადებას“ („კუმარასამბჰავა“), ლირიკულ პოემას „მუნაფა მაჩინებე“ („მეგჰადუტა“) დო დრამეფს „შაკუნტალა“ (ქორთულო თანგილი რე 1966 წანას), ნამუშ სიუჟეტი ეჭოფილი რე „მაჰაბჰარატაშე“, დო „ქომოლობათ დორთელი ურვაშა“ („ვიკრამორვაში“), ნამუშ თემა ვედეფშე მოურს, რომანტიკული, არიკულ–ფანტასტიკური დინორეშ რე. „მალავიკა დო აგნიმიტრა“ (ქორთულო თანგილი რე 1973 წანას), ნამუშ თემა ეჭოფილი რე ინდოარ მაფეფიშ რინაშე, მომაგონენა უკაჭულ ინტრიგეფშა გეგაფილჷ ახალ პიესეფს. თენა აკა ნაწარმეფი რე, ნამუსჷთ ვაქიმინჯენა ღორონთიერი დო დემონური ნძალეფი – თიში გერგეზეფი ისტორიული პიჯეფი რენა. წჷმი პლანშა წჷმოკინელი რე უბრალე კათა. თინა ავტორიშ თელარაშ ბორჯის დუდგჷმჷნა ნოღა უჯაინს.

კალიდასა कालिदास
დაბადებაშ თარიღი:	მეხოლ. IV—V ოშწანურეფი
დაბადებაშ აბანი:	ინდოეთი
ღურაშ თარიღი:	მეხოლ. IV—V ოშწანურეფი
ღურაშ აბანი:	ინდოეთი
ერუანობა:	ინდოეთი
საქვარუა:	პოეტი, დრამატურგი
ჟანრი:	ოგერგეზე ეპოსი, ლირიკა, დრამა

კალიდასაშ თხობელუეფი ჭარილი რე კლასიკურ სანსკრიტშა, ნამუსჷთ ოკათ პრაკრიტეფი – ოკათე ორაგადე ნინეფი. კალიდასა დჰვანიშ მოხელე რე, თიში პოეტური სახეეფით მოჩამილი ასოციაციეფი დო წჷმორინაფეფი იჭანუანს იდუმალ ფირქეფს, ფულირ გინაფეფს. თინა გჷმირინუანს პოეტიკაშ შხვა მოხუჯეფს ხოლო (ალანკარა, რასა). კალიდასაშ ნახანდეფს გიოხე ინდური ადათეფი დო ზნე–რჩქავნელობურეფი. თინა აკოგაფილი რე ინდურ ტრადიციულ რელიგიურ–ფილოსოფიურ მონძღვარაფეფს (თეორიეფი ირო თელარულ ციკლიშ დო შურდგუმილ სქილედეფიშ უთებუე გჷნოსახუაშ, ბაძაძიშ დო უციო შედეგიშ), ნამუშ მეჯინათ, ადამიერშო მუთუნ ვარდას ოკო ვამოსალინე. თეშ გეშა, კალიდასაშ დრამეფს არძა განცდა რჩქალი დო მელანქოლიური რე, სოდე ვეკმირცუაფჷ პოეტური ჰარმონია, ვეგინაფუაფუ კონტრასტულარა, ბერძენულ ტრაგედიაშო დჷმახასიათაფალი გინაფეფიშ დო განცდეფიშ წალიკონი. კალიდასაშ ედომუშამი ნახანდი სისქვამაშ დო ზჷმიერაფაშ გინაფეფით რე გოფშა. ევროპალ მაკითხირქ კალიდასაშ ნახანდი XVIII ოშწანურას გიჩინებაფჷ.