კუჩხბურთი

კუჩხბურთი — ბუნური სპორტი, სოდეთ ვითაართი მაკათურშე აკოდგინელი ჟირი ბუნა ოლაჸაფჷ ართიანსჷნ. ლაჸაფი მითმეურს თინკუნთხუამ მინდორს ოგოლე კარეფით ჟირხოლო ბოლოს. ლაჸაფიშ ღანკი ბუნაშ მაკათურეფ შქას ბურთით მანევრირაფა რე აწმარენჯი ბუნაშ კარშა გოლიშ მითაღალარო. თე სპორტიშ თარი დჷმახასიათაფალი წესიშ მეჯინათ, მოლაჸაფეეფს, მეკარეშ მოხ, ბურთშა ხეშ ვარა კილეშ გჷმორინაფაშ ნება ვა უღუნა ლაჸაფიშ პერიოდის. მატჩიშ გომორძგვილი თი ბუნა რე, ნამუთ უმოსი გოლს მითიღანს ლაჸაფიშ ბოლოშან. კუჩხბურთის რე ართი თარი დო ჟირი მოხვარე ხასჷლაშ სარჯუ. თარ სარჯუს უღჷ ნება ეჭოფას გჷნოჭყვადირუა – დაჯარმას დო ვარი ბუნა კონკრეტულ ეპიზოდის ლაჸაფიშ წესეფიშ დარღვიაშენინ. სარჯუს შეულებჷ მობურთეს ოძირას ჸვინთელი ვარა ჭითა ბარათინ. თენა თიშა რე მიკობუნაფილი მუზჷმაშა ჸინჩას ილაჸაფჷ მობურთექჷნ. სარჯუშე ჸვინთელი ბარათიშ ჟირშა ვარა ბონას ჭითა ბარათიშ ძირაფაშ შვანს მობურთე იტენს მინდორს.

ლაჸაფიქ ალმახანურ სახეთ დირსხუ ინგლისის, მუსჷთ კუჩხბურთიშ ასოციაციაშ დორსხუაფაქ მაჸუნჷ, ნამუდგაშ 1863 წანას აკოდგინელ კანონეფქ გოპიჯალუ სპორტიშ გოვითარაფა თეშ, მუჭოთ თის თეჟამო ლაჸაფენან. კუჩხბურთიშ ინტერნაციონალური მადუდე ორგანიზაცია რე ფიფა (ფრანგ. Fédération Internationale de Football Association; აკრონიმი - FIFA). არძოშე პრესტიჟული ოკუჩხბურთე ნირზი რე ფიფა-შ მოსოფელიშ ჩემპიონატი, ნამუსჷთ არძოშე უმოსი მაჯინე ჸუნს მოსოფელს სპორტულ ჸოფირებეფ შქას.

ქოძირით თაშნეშე

კუჩხბურთიშ წესეფი

რესურსეფი ინტერნეტის

ფიფა-შ ოფიციალური ვებ-ხასჷლა.
ლაჸაფიშ წესეფი ფიფა-შ ოფიციალურ ვებ-ხასჷლას.
საქორთუოშ კუჩხბურთიშ ფედერაციაშ ოფიციალური ვებ-ხასჷლა.