ლორენციშ მენდალი
ლორენციშ მენდალი — ნიდერლანდეფიშ ხელუანობეფიშ დო მენცარობეფიშ ომაფე აკადემიაშ ჯილდო, ნამუთ ირ ოთხი წანას გინმაჩამუ გიშარჩქინელ მენცარეფს, ნამუეფით მოღალენა თეორიული ფიზიკაშ დარგის. ჯილდოქ დირსხუ 1925 წანას დო თინა ნიდერლანდარი ფიზიკოსიშ, ნობელიშ პრემიაშ ლაურეატიშ ჰენდრიკ ლორენციშ ჯოხონობაშ რე. მენდალიშ მაართა ლაურეატი გერმანალი ფიზიკოსი მაქს პლანკი რდჷ.
ლორენციშ მენდალი ართ-ართი პრესტიჟული დო რეიტინგული ჯილდო რე ფიზიკაშ დარგის. ლორენციშ მენდალიშ ლაურეატეფი შხვადოშხვა ბორჯის რდეს შინელი ფიზიკოსეფი: ვოლფგანგ პაული, პეტერ დებაი, არნოლდ ზომერფელდი, ჰენდრიკ ანტონი კრამერსი, ფრიც ლონდონი, ლარს ონსაგერი, რუდოლფ პაიერლზი, ფრიმენ დაისონი, ჯორჯ ულენბეკი, ჯონ ჰაზბრუკ ვან ფლეკი, გერარდ ჰოფტი, ედვარდ ვიტენი დო შხვეფი.