ლუღი (ლათ. Ficus carica) — სუბტროპიკული ჩანარი ჯაპიშობურეფიშ ფანიაშ ფიკუსიშ გვარშე. ლუღი მენჩხერო დოჸალერი ჯა რე. სიმაღალა 4-12 მ-ს ანჭჷ. ჭყინტი ყერწეფი მოწვანე-ტუტაშფერი რე, ბუძგურამი ვარ-და ტარკალე, ბჟაწვენს იკათუანს. ლუღი ართ- ვარდა ჟირჸუდეამი ჩანარი რე. ართსქესამი პეულეფი ინოხე ძალამ გოცვიებულ პეულინოხვენიშ ქოქას. პეულინოხვენიშ კიდალეფი ეშაფინელი რე. ანდა ჭიფე ბუტკოიანი (დადული) პეულით, ტვრიანამი (მუმული) პეულეფი - თიშ ჟილენი ნორთის ეშახე. პეულეფი იტვერებუ ჭიჭე მაფსკალიაშით — პლასტოფაგაშ მეშქაშალათ. ნანდული გუმნაღელი მორჩილი კაკალი რე. გუმნაღელა (ტყურელე გუმნაღელი), ნამუთ ოჭკომალო გჷმირინუაფჷ, კანკალეშა პართენოკარპულო (უგუნაჸოფიერაფილო) ივითარებჷ. ლუღი დიხაშოთ დიდ მოთხირებს ვეგმირჩქინანს — ჯგირო გუთმურძჷ სქირე, ქუაღორღამ, კირამ აბანეფს, ჩანს გორცვილ აბანეფს, გიმნასვიმონეფს, კანკალეშა დგჷმილეფიშ აკნაცჷმეფს დო კირდეეფს ხოლო. ტომბა დიხას დო ზჷმიერო ლამე პიჯალეფს ძალამ მაღალ ტემპერატურას ურძჷ, დაბალი ტემპერატურაშოთ უმოსო მაგინაფუ რე დო 12-14 °C-ის უკვე ნორთობურო იცხალჷ, ჩანს 100-200 წანას.
