მოლეკულური ბიოლოგიაშ ევროპული ორგანიზაცია
მოლეკულური ბიოლოგიაშ ევროპული ორგანიზაცია (ინგლ. European Molecular Biology Organization, EMBO) რე პროფესიული ევროპული ორგანიზაცია, ნამუქჷთ დირსხუ 1964 წანას ბიოლოგიური რკვიებეფიშ ხეშ შეიონწყუალო. ორგანიზაცია აფინანსენს შხვადოშხვა მენცარულ კონფერენციეფს, ვორკშოპეფს დო ხეს უნწყუნს მენცარეფს ფინანსურო. EMBO-შ მაკათური რე 1800-შე უმოსი მენცარი. EMBO-შ მაკათურობა პრეტიჟული ჯილდო რე. EMBO მენცარეფს გინმოჩანს შხვადოშხვა ჯილდოეფს: EMBO-შ ორქოშ მენდალი რე ირწანიანი ჯილდო, ნამუსჷთ მოჸუნს 10,000 ევროშ მუდანობაშ ფინანსური პრემია. ჯილდოქ დირსხუ 1986 წანას. EMBO გინმოჩანს ოსურ-მენცარეფს პრემიას "FEBS/EMBO Women in Science Award". EMBO ფინანსურო ოხვარ დუმაჭყაფჷ მენცარეფს გრანტეფით დო სტიპენდიეფით ხოლო. მოლეკულური ბიოლოგიაშ ევროპული ორგანიზაციაშ მაართა დირექტორი რდჷ მაქს პერუცი დო გენერალური მელამოსე ჯონ კენდრიუ. ასეიან დირექტორი რე გერმანალი ბიოლოგი დო იმუნოლოგი კელნიშ უნივერსიტეტიშ პროფესორი მარია ლეპტინი, ნამუსჷთ ჸათე პოსტი უკებჷ 2010 წანაშე. მოლეკულური ბიოლოგიაშ ევროპული ორგანიზაციაწკჷმა აფილირებული ორგანიზაციეფი რე: მოლეკულური ბიოლოგიაშ ევროპული ლაბორატორია დო ევროპული ბიოქიმიური ჯარალუეფიშ ფედერაცია. EMBO-შ ცენტრალური ოფისი იდვალუაფჷ გერმანიაშ ნოღა ჰაიდელბერგის.