ოორუე-ბჟადალიშ უნივერსიტეტი
ოორუე-ბჟადალიშ უნივერსიტეტი (ინგლ. Northwestern University) — კერძო უნივერსიტეტი, ააშს, ილინოისიშ შტატიშ ნოღა ევანსტონს. უნივერსიტეტიქ დირსხუ 1851 წანას, ჸოფილი ოორუე-ბჟადალიშ ტერიტორიეფიშ შტატეფიშო. ოორუე-ბჟადალიშ უნივერსიტეტი ამერიკაშ ართ-ართი უჯვეშაში უნივერსიტეტი რე. უნივერსიტეტი დუდშე აფილირებული რდჷ მეთოდისტეფიშ ეპისკოპალური ეკლესიაწკჷმა დო უკულიან წანეფს გინირთჷ ვასექტორულ უნივერსიტეტო. 1900 წანას უნივერსიტეტი სიდიდათ მასუმა რდჷ ამერიკას. 1896 წანას უნივერსიტეტი რდჷ დიდი ვითიშ კონფერენციაშ ართ-ართი დუმარსხუაფალი. 1917 წანას უნივერსიტეტიქ გინირთჷ ამერიკული უნივერსიტეტეფიშ ასოციაციაშ მაკათურო.
| ოორუე-ბჟადალიშ უნივერსიტეტი ინგლ. Northwestern University | |
| |
| დევიზი | Quaecumque sunt vera (ლათ.) Ὁ Λόγος πλήρης χάριτος καὶ ἀληθείας (ბერძ.) |
|---|---|
| დირსხუ | 1851 |
| ტიპი | კერძო |
| ფონდეფი | $ 16.1 მლრდ. (2021) |
| წორომახანდე | 3,781 (2018) |
| პრეზიდენტი | მორტონ ოუენ შაპირო |
| პროვოსტი | კეთლინ ჰეგერტი |
| სტუდენტი | 21,946 (2019) |
| ორენი |  ევანსტონი, ილინოისი, ააშ
|
| კამპუსი | ურბანული |
| საიტი | northwestern.edu |
| |
ოორუე-ბჟადალიშ უნივერსიტეტი იკათუანს 11 სკოლას: მენეჯმენტიშ სკოლას, მედიცინაშ სკოლას, ხელუანობეფიშ დო მენცარობეფიშ კოლეჯის, მუსიკაშ სკოლას, ინჟინერიაშ სკოლას დო შხვეფს. უნივერსიტეტიშ კამპუსი იდვალუაფჷ მიჩიგანიშ ტობაშ წყარპიჯის, ნოღა ევანსტონს. უნივერსიტეტიშ იურისპრუდენციაშ, მედიცინაშ დო პროფესიული სკოლეფი იდვალუაფჷ ჩიკაგოშ სტრიტერვილიშ რაიონს, ჟურნალისტიკაშ სკოლა იდვალუაფჷ ნიუ-ისტსაიდის. უნივერსიტეტის უღჷ კემპუსეფი მაიამის, სან-ფრანცისკოს დო ვაშინგტონს ხოლო.
უნივერსიტეტიშ ფინანსური ენდაუნმენტი 16.1 მილიარდი ამერიკული დოლარი რე დო ჸათე მუნაჩემეფით ოორუე-ბჟადალიშ უნივერსიტეტი ართ-ართი უდიდაში რე ამერიკაშ უნივერსიტეტეფიშე. უნივერსიტეტიშ ირწანური ბიუჯეტი 2.5 მლრდ. ამერიკული დოლარი რე. 2019 წანაშ მუნაჩემეფით უნივერსიტეტის ჸუნს 21,946 სტუდენტი.
ოორუე-ბჟადალიშ უნივერსიტეტიშ კურსნათებუეფი დო უნივერსიტეტიწკჷმა აფილირებულეფი რდეს: ნობელიშ პრემიაშ 22 ლაურეატი, პულიცერიშ პრემიაშ 42 ლაურეატი, 23 მაკარტურიშ სტიპენდიანტი, 28 მარშალიშ სტიპენდიანტი, ამერიკაშ ხელუანობეფიშ დო მენცარობეფიშ 94 მაკათური, 16 როდსიშ სტიპენდიანტი, 10 მილიარდერი დო ოლიმპიადეფიშ 24 მედალისტი.
ლიტერატურა
რედაქტირაფა- Pridmore, Jay (2000). Northwestern University: Celebrating 150 Years. Evanston, Illinois: Northwestern University Press. ISBN 0-8101-1829-7.
რესურსეფი ინტერნეტის
რედაქტირაფა