ოსირისი
ოსირისი (ეგვიპტურო „უსირ“) — ჯვეშ ეგვიპტურ მითოლოგიას ართ-ართი უთარაში ღორონთი; ჩანარობაშ დო წყარიშ ღორონთი, ღურელეფიშ მაფორალი დო სამართალიშ გუმარჩქინე. დიხაუჩაშ ღორონთიშ გებიშ დო ცაშ ოსურღორონთიშ ნუტიშ სქი, ისიდაშ ქომონჯი დო ჯიმა, ჰოროსიშ მუმა. ჯვ. წ. III ვითოშწანურაშ შქა ხანეფშე ოსირისიშ კულტი ნოღა ბუსირისშე ედომუშამ ეგვიპტეს გიფაჩჷ. კულტიშ ცენტრო ნოღა აბიდოსიქ გჷნირთჷ. ირწანურო აბიდოსის ქურუმეფი ოსირისიშ გვალაშ ეპიზოდეფს კათაშ წჷმი დრამატულ სცენეფო წჷმარინუანდეს. მითიშ მეჯინათ, ოსირისი დორხველ ომაფეს (დიხაუჩას) მოკოთ დო სამართალიანო მართჷნდ. ნჯარიშ ეშაღალაშ გეშა თინა ჸვილჷ ჯიმაქ — სეთიქ, ტიოზიშ უბადო ღორონთიქ, დო თიში ლოხი წყარმალუ ნილოსშა ქენუოთამჷ. ისიდას ქუძირჷ ქომონჯიშ ნოღური, მარა სეთიქ თინა მიხირჷ, 40 ნორთო დორთუ (ნომეფიშ რიცხუშ ომანგეთ) დო ედომუშამ ეგვიპტეს გუჩხვარუ. დიდი გორუაშ უკული ისიდას დუშაყარუ ოსირისიშ ლოხიშ ნორთეფი დო გჷთელარებუ. ბერძენულ-რომაულ ეპოქას ოსირისიშ კულტიქ ფართოთ გიფაჩჷ ეგვიპტეშ ფარგანეფიშ გალე. ოსირისიშ კულტი, ღურელი დო გონათაფილი ღორონთიშ ორთას ასახიერენდჷ.
| ოსირისი | |
|---|---|
 ოსირისი ჩანარობაშ, წყარიშ, თიქიანობაშ დო სამართალიშ გუმარჩქინეშ ღორონთი | |
| მითოლოგია: | ჯვეში ეგვიპტე |
| შხვა კულტურეფს: | Osiris Hemag |
| სქესი: | ქომოლი |
| მუმა: | გები |
| ნანა: | ნუტი |
| და დო ჯიმა: | სეთი, ისიდა |
| ალმასქუ: | ისიდა |
| სქუალეფი: | ჰოროსი, ანუბისი |
| ნთხორუაშ აბანი: | აბიდოსი |
| გჷმოხანტუალეფი | |
| ოსირისი იეროგლიფეფს | |||
|
ლიტერატურა
რედაქტირაფა- Martin A. Larson, The Story of Christian Origins (1977, 711 pp. ISBN 0-88331-090-2 ).
- C. W. Leadbeater, Freemasonry and its Ancient Mystic Rites (Gramercy, 1998) ISBN 0-517-20267-0
