რადიორეღმეფი
რადიორეღმეფი — ელექტრომაგნიტური გჷმოჩხორიაფაშ ტიპი, ნამუშ რეღმაშ სიგჷნძა ელექტრომაგნიტურ სპექტრის ინფრაჭითა გოსინთაფაშე უმოსი რე. რადიორეღმეფიშ სიშხირა 3 კჰც-შე 300 გჰც-შახ რე. 300 გჰც-იშ რადიორეღმაშ სიგჷნძა 1 მმ. რე, 30 ჰც-იშ რადიორეღმაშ 10,000 კმ. რადიორეღმეფი მუჭოთ შხვა ელექტრომაგნიტური რეღმეფი, სინთეშ ბიწორათ იფაჩუ. რადიორეღმეფი წჷმიქიმინუ დოხარხილი წულუკეფიშ აქსელერაციაშ ბორჯის. რადიორეღმეფი რე ორთაშობური დო ხელუანური. ორთაშობურ რადიორეღმეფს წჷმოქიმინუნა, სამანგათ ასტრონომიული ობიექტეფი. ხელუანური რადიორეღმეფს აკმოქიმინჷნა, სამანგათ ტრანზმიტერეფი. რადიორეღმეფს ღებულენა რადიო-რესივერეფი, ანტენეფიშ გჷმორინაფათ. რადიორეღმეფი გჷმირინუაფუ ტექნოლოგიაშ შხვადოშხვა დარგეფს: რადიოკომუნიკაციაშო, რადიონავიგაციაშო, ტელევიზიაშო, კომპიუტერული სისტემეფიშო დო შხვა. კონცეფცია რადიორეღმეფიშ ჸოფაშ გეშა, წჷმარინუ შოტლანდიარ მათემატიკოს დო ფიზიკოს ჯეიმზ კლერკ მაქსველქ, 1867 წანას. მაქსველიშ არზით სინთე ელექტრომაგნიტური რეღმეფიშე აკმოდირთუდჷ დო თინეფიშ რეღმეფიშ სიგჷნძა ძალამი კუნტა რდჷ. მაართა მენცარი ნამუქჷთ შილებუ რადიორეღმეფიშ მეღება რდჷ გერმანალი ფიზიკოსი ჰაინრიხ ჰერცი. თიქ 1887 წანას, მუშ ლაბორატორიას აკეთჷ რადიორეღმეფიშ გენერაცია. 1894-1895 წანეფს, იტალიარ მენცარ გულიელმო მარკონიქ გჷმიგონუ მაართა პრაქტიკული რადიოტრანზმიტერეფი დო რესივერეფი. ჸათე დო შხვა მენცარული ნახანდეფიშ გეშა მარკონის 1909 წანას გინოჩეს ნობელიშ პრემია. რადიოკომუნიკაციეფიშ მასიური გოვითარაფა დიჭყეს 1900-იან წანეფშე.
