რობერტ გოდარდი

რობერტ ჰათჩინგს გოდარდი (ინგლ. Robert Hutchings Goddard; დ. 5 გჷმათუთა, 1882, ვუსტერი, მასაჩუსეტსი, ააშ — ღ. 10 მარაშინათუთა, 1945, ბალტიმორი, მერილენდი, ააშ) — ამერიკალი ფიზიკოსი, ინჟინერი დო გჷმმაგონებელი. ეიოგჷ რაკეტა ნამუშ ქვარქვანტი თხევადი ოჭვალით მუშენდჷ. 1926-1941 წანეფს გოდარდიშ დო თიშ ბუნაშ ეგაფილ რაკეტეფქ მიოჭირინუ ჸათე პერიოდიშო მაქსიმალურ 2.6 კმ.-იშ სიმაღალას დო ფურინუაშ მაქსიმალურ სიჩქარას 885 კმ/სთ-ის.

რობერტ გოდარდი
ინგლ. Robert H. Goddard
დაბადებაშ თარიღი:	5 გჷმათუთა, 1882
დაბადებაშ აბანი:	ვუსტერი, მასაჩუსეტსი, ააშ
ღურაშ თარიღი:	მარაშინათუთა 10, 1945 (62 წანერი)
ღურაშ აბანი:	ბალტიმორი, მერილენდი, ააშ
მენოღალობა:	ააშ
ომენცარე სფერო:	კოსმონავტიკა
ალმა-მატერი:	ვუსტერიშ პოლიტექნიკური ინსტიტუტი კლარკიშ უნივერსიტეტი
ომენცარე ხემანჯღვერი:	არტურ გოდონ უებსტერი
ჯილდოეფი დო პრემიეფი:	კონგრესიშ ორქოშ მენდალი (1959) ლენგლიშ ორქოშ მენდალი (1960) დენიელ გუგენჰაიმიშ მენდალი (1964)
ხეშმოჭარუა:

რობერტ გოდარდი გურაფულენდჷ ვუსტერიშ პოლიტექნიკურ ინსტიტუტის. უკულ გურაფა გაგინძორჷ კლარკიშ უნივერსიტეტის. რაკეტული ტექნოლოგიეფით ორდოიანი წანეფიშე დეინტერესჷ. გოდარდიშ 214-შე ჟირი პატენტის, მიარე დონიანი რაკეტას (1914) დო რაკეტას, თხევადი ოჭვალიშ ქვარქვანტით (1914) დიდი შანულობა უღუდჷ კოსმონავტიკაშო. 1919 წანაშ გოდარდიშ მონოგრაფია "ექსტრემალური სიმაღალაშ მეჭირინაფაშ მეთოდეფი" მერჩქინელი რე კლასიკათ მაეჩა ოშწანურაშ რაკეტული ტექნოლოგიეფიშ დარგის. გოდარდიშ ჟირი-ღერძიშ კონტროლიშ მექანიზმი რდჷ პიონერული მეთოდი რაკეტეფიშ ტექნოლოგიაშო. ჸათე მეთოდით რაკეტეფს შეულებუდჷ ფურინუაშ ეფექტური კონტროლი.

რობერტ გოდარდიშ ტექნიკა, მეთოდეფი დო მექანიზმეფი რდჷ რევოლუციური, მარა გოდარდის მუში პროექტეფიშ გოვითარაფაშო ფინანსეფი მითინშე ვემუღებჷ. მორალურო ხოლო მითინ ვალურდჷ. პრესა დო შხვა მენცარეფი გოდარდის დო თიშ იდეეფს გაციგანუდეს. გოდარდიქ ღურაშ უკული მიპალუ დიდი რეპუტაცია მუჭოთ რაკეტული ტექნოლოგიეფიშ ართ-ართ დუმარსხუაფალქ. გოდარდი, რუსი კონსტანტინე ციოლკოვსკი, გერმანალი ჰერმან ობერთი დო ფრანგი რობერ ესნო-პელტრიწკჷმა ართო, მერჩქინელი რე რაკეტული ტექნოლოგიეფიშ დუმარსხუაფალ-მუმათ.

რობერტ გოდარდი, ღურაშ უკული, რდჷ შხვადოშხვა პრემიეფიშ დო ჯილდოეფიშ ლაურეატი. 1959 წანას გინოჩეს კონგრესიშ ორქოშ მენდალი, 1960 წანას ლენგლიშ ორქოშ მენდალი დო 1964 წანას დენიელ გუგენჰაიმიშ მენდალი.

გიშნაგორა პუბლიკაციეფი

• A Method of Reaching Extreme Altitudes- Goddard 1919

რესურსეფი ინტერნეტის

• რობერტ გოდარდი ენციკლოპედია ბრიტანიკას
• ბიოგრაფიული ფაქტეფი
• რობერტ გოდარდიშ არქივი კლარკიშ უნივერსიტეტის
• რობერტ გოდარდი დო თიში რაკეტეფი
• რობერტ გოდარდი: კოჩი დო თიში რაკეტეფი Archived 2022-09-07 ვებ-ხასჷლას Wayback Machine.
• გოდარდიშ მემორიალური ასოციაცია