რჩქინა
რჩქინა – 1). ჯარალობურ-ისტორიული პრაქტიკათ გინომოწმებული დო ლოგიკურო დოდასურაფილი სინანდულაშ ემეთი, ადეკვატური ეხანტუა ადამიერიშ სმებას წჷმორინეფიშ ჩინებეფიშ, სხუნუეფიშ დო თეორიეფიშ სახეთ. რჩქინა ობიექტური ოკო რდას რწუმაშე გინორთი, ნამუთ გმოხანტუნს ადამიერიშ სუბიექტურ დორწუმობას. გიშმართჷნა ვამენცარულ დო მენცარულ რჩქინეფს.[1]
ვამენცარული რჩქინა წჷმარინუანს თიჯგურა რჩქინას, ნამუთ ვა რე გოჭყაფილი მენცარული მეთოდეფით. თაქ გიმერთუ ჟირი სახე – მენცარობაშახიანი დო მენცარულიშ აწმარენჯი რჩქინეფი. მენცარობაშახიანი რე თიჯგურა რჩქინა, ნამუთ ადამიერს მოპალაფირი აფუ ირდღარი გჷმოცადაფაშ ოსხირშა დო გეპონუ თარი აზრიშ ნაკას. მენცარულიშ აწმარენჯი რჩქინა ვეგეპონუ მენცარულ მეთოდეფს დო თიში მოწმება ობიექტური მეთოდეფით პრინციპულო გჷმორიცხილი რე. თინა ნანდული ვარინ, უმოსო მოძირაფონი რჩქინა რე.[1]
მენცარული რე რჩქინა, ნამუთ მენცარული მეთოდეფით მეღება დო ობიექტურ გჷნომოწმებუობას დოჸუნს. თიში გოჭყაფა გეპონუ ცადებას ვარდა ლოგიკურ ნტკიცაფას, ომანგეთ მიღჷნა ცადებაშური ვარდა თეორიული რჩქინა.[1]
2). რჩქინა წჷმარინუანს ადამიერიშით შეძინელ დო გჷმომუშაფილ თიჯგურა ნიჭის, ნამუშ მეშქაშობათ, შილებე აკიქიმინას ახალი ოხვილური ინფორმაციაქ, ვარდა უკვე ჩინებული ინფორმაციაშე თიჯგურა ახალი მატერიალური, ონინალე, ვარდა ინტელექტუალური პროდუქტი, ნამუშეთ რე ვარდა შილებე გორჩქინდას მოთხირქ, ანუ იმატერიალიზებუას ირნერი სახეშ/კატეგორიაშ ოხვილობას (ვამატერიალურ, მატერიალური, მორალურ დო სოციალურ ღირებას).[2]
3). ნინაშ საშუალებათ ფიქსირაფილი (ზეპირი დო ჭარილი ფორმათ) რჩქინა გამნარჸშე გამნარყშა გინმიჩამუ ჟირი რზათ: სტიქიურო (პრაქტიკული ეშაჩინებეფიშ გჷნოჭყვიდუაშ ბორჯის) დო ორგანიზაფილი გურაფაშ საშუალებათ. რჩქინაშ მეღებას მუსხირენი ეშალი რსებენს: არძაშე დაბალი, მაჟირა ეშალი, მაღალი ეშალი.[1]