სიმონ ჯანაშია
სიმონ ჯანაშია (დ. 26 (13) კვირკვე, 1900, მაკვანეთი, ასეიანი ოზურგეთიშ მუნიციპალიტეტი - ღ. 5 გერგობათუთა, 1947, ქართი) — ქორთუ ისტორიკოსი დო ოჯარალუ მოღალე, საქორთუოშ მენცარობეფიშ აკადემიაშ ართ-ართი გჷმაჭყაფალი, ისტორიულ მენცარობეფიშ დოქტორი, პროფესორი.
მუამუშ, ნიკოლოზ ჯანაშია (1872-1918) რდჷ ჩინებული ქორთულიშ მაგურაფალი, ეთნოგრაფი დო ოჯარალუ მოღალე. 1922 წანას სიმონ ჯანაშიაქ გათუ ქართიშ სახენწჷფო უნივერსიტეტი. 1924-1947 თე უნივერსიტეტიშ ლექტორი, უკული ასოცირებული პროფესორი დო უკული რსული პროფესორი რდჷ.
1941 წანას ართ-ართი რდჷ საქორთუოშ მენცარობეფიშ აკადემიაშ გჷმაჭყაფალეფშე, 1941-47 წანეფს რდჷ თე აკადემიაშ ვიცე-პრეზიდენტი დო ისტორიაშ ინსტიტუტიშ დირექტორი. 1943 წანას გჷშასხუნილქ იჸუ სხუნუეფიშ მენცარობეფიშ აკადემიაშ აკადემიკოსო.
სიმონ ჯანაშიაშ ომენცარე მოღალობაშ თარი სფერო რდჷ ქორთუ კათაშ დო შხვა იბერიულ-კავკასიური კათეფიშ ეთნოგენეზისი; საქორთუოს დო კავკასიას ფეოდალიზმიშ დორსხუაფა, ჯვეში საქორთუოშ ისტორია, არქეოლოგია, კოლხეთიშ დო იბერიაშ ომაფეეფიშ ისტორია, ქირსიანობაშ ისტორია საქორთუოს დო შხვა. მუს ორხველჷ 100-შე უმოსი ომენცარე-რკვიებითი ნახანდი, (თენეფშე 10 მონოგრაფია). 1949-1968 წანეფს ქართის გჷშაშქუმალირქ იჸუ ჯანაშიაშ ნახანდეფიშ კორობილქ ოთხ ტომო.
1940-იან წანეფს ჯანაშია რდჷ მცხეთაშ დო არმაზიშ არქეოლოგიური გონთხორუეფიშ ართ-ართი ორგანიზატორი.
დოღურჷ 1947 წანას, ქართის.