ტვინი: გინორთი გინოჯინეფს შქას

'''ტვინი''' — ნერვული სისტემაშ ცენტრალური ნორთი, ნამუთ უნარღელჸოფენს ორგანიზმიშ ოთელარე ფუნქციეფიშ რეგულაციაშ დო უმაღალაში ნერვული ქიმინჯალაშ გოხორციალაფაშ არძაშე რსულჸოფურ ფორმეფს. ტვინიშ თარი სტრუქტურულ-ფუნქციური ართული რე ''ნეირონი''. ''ფილოგენეზის'' ნერვული კურთხუეფიშ დიფუზური ბადე ითირუ გონკერზაფილი ნერვული ნასქვეფით, ნამუეფით გოთანჯილი სახეთ დონწკარუა აკმოქიმინჷნს ქვარაშ ძეწკვის — ქვარაშ ტვინს. კანკალე ჭანდის დო მოლუსკის უაღრესო უღჷ გოვითარაფილი დუდიშ განგლიონი, თ. ჯ. დუდიშ ტვინი. გაგაჩამი ჩხოლარეფიშ დო ადამიერეფიშ ტვინი აკმოდირთუ ოჭიშიშ ტვინშე დო დუდიშ ტვინშე, ფორილი რე დაცხეფით დო თხილერი რე გაგაჩიშ დო დუდიშ ხოკოშ ყვილამი ნორშვეფით. დუდიშ ტვინი იკათუანს ტვინიშ ღერს (მოგჷრძე ტვინი, ხინჯი, შქა ტვინი), ნათხემს დო დიდ ტვინს, ნამუთ გიშართილი რე 2 ჰემისფეროთ დო მერსხილი რე ტვინიშ ღერწკჷმა შქამადვალუ ტვინით. რდილი ადამიერიშ დუდიშ ტვინიშ წონა ოშქაშეთ 1400 გრამი რე; ოჭიშიშ ტვინიშ — აკმადგინანს ტვინიშ წონაშ 2%–ს, ნათხემიშ – 10%–ს, ღერიშ სტრუქტურეფიშ – 6%–ს. ტვინიშ წონაშ 5/6 მოურს დიდი ტვინიშ ჰემისფეროეფშა. ტვინი აკმოდირთუ რუმე (იკათუანს ნეირონეფიშ რსხულეფს დო დენდრიტეფს) დო ჩე (იკათუანს აქსონეფს, ნამუეფიშ ''მიელინური დაცხი'' გჷთმოპიჯანს ჩე ფერს) ნიბთიარობაშე. ტვინიშ ევოლუცია მერსხილი რე ნთელ რანწკი მორფოლოგიურ გჷნოქიმინუეფს, მუჭომით რე დუდიშ ტვინიშ დო დიდი ტვინიშ ჰემისფეროეფიშ ალაზჷმაფონი წონაშ, დიდი ტვინიშ ჸვაშ დო საფეთქელიშ წილეფიშ ალაზჷმაფონი ზჷმეფიშ, ღარეფიშ სიტომბეშსიტომბაშ დო კარკატუეფიშ მუდანობაშ ძინა დო ტვინიშ შვაბელიშ აკოგაფაშ გორთულაფა. ''ანთროპოგენეზიშ'' პროცესის ტვინიშ მუშობურ გჷნოქიმინუაქ დო დიფერენციაციაქ ოპტიმალური კომპლექსი აკოქიმინჷ ''ნეოანთროპის'', ნამუსჷთ იდვალუაფუ ტვინიშ დო დიდი ტვინიშ დიდი ალაზჷმაფონი წონა დო ახალი შვებელიშ ჭყანიერი გოვითარაფა, სპეციფიკური ციტოარქიტექტონული ველეფიშ წჷმოქიმინუა, მაუთ დჷმახასიათაფალი რე ხვალე ადამიერეფშო. ინტეგრაციაშ მაღალი დონე უნარღელჸოფილი რე ნეირონეფიშ დიდი მუდანობათ, მაღალი სპეციალიზაციათ, ურთიართწკარუაშ დო კონტაქტეფიშ სირთულათ.