კაპიტოლიუმი (ვაშინგტონი)

კაპიტოლიუმი (United States Capitol) — დგჷმილი, ნამუსჷთ იდვალუაფუ ააშ-იშ კონგრესი. კაპიტოლიუმი ვაშინგტონიშ არძაშე უმაღალაში დგჷმილი რე, ნამუშ აკოგაფაქ 1793 წანაშ 18 ეკენიას დიჭყჷ, მუჟამსჷთ დგჷმილიშ ნერჩის მაართა ქუა ქიანაშ მაართა პრეზიდენტ ჯორჯ ვაშინგტონქ დოდუნ. დგჷმილი აკაგჷ მოჸოროფე არქიტექტორ უილიამ თორთონქ. კაპიტოლიუმიშ დღა 18 ეკენიას ეიშანუაფუ.

კაპიტოლიუმი

თე დგჷმილს, კონგრესიშ მაართა ხუნაქ 1800 წანაშ 21 გერგობათუთას იმანჯჷ. კაპიტოლიუმს 540 ოთახი რე, თაქ რე მუჭოთ სენატიშ, თაშნეშე წჷმმარინაფალეფიშ პალატა ორენი. გოლათიშ ედომუშამი სიგჷრძა 89 მეტრი რე, დო დიამეტრი - 11 მეტრი. გოლათი ჸონიერ 36 კოლონას გედგჷ (36 კოლონა თი ბორჯიშო შტატეფიშ მუდანობას წჷმმარინუანდჷ). კაპიტოლიუმიშ დგჷმილშე ბონას მეჸუნს მოლი, ნამუთ პარიზიშ ჯოხოგოლაფირ ელისეშ მინდორეფს მოგენს. მოლიშ მაჟირა ბოლოს გედგჷ ნანანოღაშ შანულამი ორიენტირი — ვაშინგტონიშ მონუმენტი.