ჯორჯ მაინოტი: გინორთი გინოჯინეფს შქას

ჯორჯ რიჩარდს მაინოტიქ დებადჷ 1885 წანაშ 2 ქირსეთუთას, ბოსტონს, მასაჩუსეტსის. გურაფულენდჷ ჰარვარდიშ კოლეჯის. ჰარვარდიშ მედიცინაშ სკოლას მიპალუ მედიცინაშ დოქტორიშ ხარისხი. 1913-1915 წანეფს მუშენდჷ [[უილიამ ჰენრი ჰაუელი]]შ ლაბორატორიას, ჯონ ჰოპკინზიშ მედიცინაშ სკოლას. თაქ თინა გურაფულენდჷ [[ზისხირი]]შ მათხითხარებელ ცილეფს. 1915 წანას ომუშებუშა გინორთჷ მასაჩუსეტსიშ ჰოსპიტალშა, სოდეთ დიჭყჷ [[ანემია]]შ დოგურაფა. [[მაართა მოსოფელიშ ლჷმა]]შ ბორჯის რდჷ ქირურგი [[ააშ|ამერიკაშ]] არმიას. 1917 წანაშე მაინოტი მუშენდჷ კოლის ჰანთინგტონიშ მემორიალურ ჰოსპიტალს, ბოსტონს, სოდეთ 1934 წანაშე რდჷ თარი ექიმი. მაინოტიქ [[ჰარვარდიშ უნივერსიტეტი]]ს გინირთჷ მედიცინაშ პროფესორო დო დიჭყჷ მუშობა ბოსტონ-სიტი-ჰოსპიტალიშ ლაბორატორიას, დირექტორო. 1930 წანას მაინოტის გინოჩეს კამერონიშ პრემია, [[უილიამ პარი მერფი]]წკჷმა ართო. 1934 წანას მიპალუ [[ნობელიშ პრემია]] ([[ჯორჯ უიპლი]] დო უილიამ პარი მერფიწკჷმა ართო). ჯორჯ მაიტონქმაინოტიქ დო კოლეგეფქ აკიმუშუეს ეფექტური მეთოდი [[პერნიციოზური ანემია]]შ კურნალობაშო. პერნიციოზური ანემიაშ კურნალობა ვაარსებენდჷ. 1920 წანეფს ანემიას შხვადოშხვა მეთოდეფით დო მედიკამენტეფით კურნალენდეს, მარა ნამთინ კურნალობა ეფექტური ვარდჷ. ჯორჯ მაინოტიშო [[ჯორჯ უიპლი]]შ ადრეიან ექსპერიმენტეფ ინტერესუან რდჷ. ჯორჯ უიპლი ჯოღორეფშე ზისხერს გუტენდჷ დო თინეფს ანემიურო გინმაშკვანდჷ, უკულ შხვადოშხვა ოჭკომალეფს: ჭითა ხორცის, [[ჩხონჩხი]]ს ქოჩანდჷ დო უკულ ოკვირუდჷ ჯოღორეფს, გეუჯგუშებუდესო. ჯორჯ უიპლიქ ძირუ ნამდა ჩხონჩხიშ ჭკომუნდუნჷ თი ჯოღორეფ ხელათ იუჯგუშებუდეს. მაინოტიქ დო მერფიქ გინოჭყვიდეს ჩხონჩხიშ თერაპიაშ გიმორინაფა [[ადამიერი|ადამიერეფშო]]. მაინოტიშ კოლეგეფ ექსპერიმენტის სკეპტიკურო უჯინედეს, მარა ექსპერიმენტიქ ქიმიშუ. მაინოტიქ დო მერფიქ აკურნალეს 45 პაციენტი, არძოშო კურნალობაქ ეფექტურქ იჸუ. უკულ შხვადოშხვა მენცარეფქ ქიდიგურეს ნამდა ჩხონჩხიშ თარი ინგრედიენტი რე [[ვიტამინი B12]], ნამუსით უღუდჷ ეფექტურობა კურნალობაშ ბორჯის. უკულიან პერიოდეფს, პერნიციოზური ანემიაშ კურნალობა რდჷ B12-შ ინექციათ.