კოლუმბიაშ უნივერსიტეტი: გინორთი გინოჯინეფს შქას

'''კოლუმბიაშ უნივერსიტეტი''' (თაშნეშე '''კოლუმბია''', '''კოლუმბიაშ უნივერსიტეტი ნოღა ნიუ-იორკის''') რე კერძო, [[აივიშ ლიგა]]შ მაკათური უნივერსიტეტი [[ნიუ-იორკი]]ს. უნივერსიტეტიქ დირსხუ [[1754]] წანას, მუჭოთ ომაფე კოლეჯიქ, დიდი ბრიტანეთიშ მაფა [[ჯორჯ II]]-შ ომაფე ქარტიათ. 1784 წანას, [[ამერიკაშ რევოლუცია]]შ უკულ თის ქიგიადჷ კოლუმბიაშ კოლეჯიშ ჯოხოქ. 1896 წანას კოლეჯიშ კამპუსიქ გინილჷ თიშ ასეიან ლოკალიზაციშა [[მორნინგსაიდ ჰაიტსი]]შა. ჸათეშ უკულ უნივერსიტეტის ქიგიადჷ კოლუმბიაშ უნივერსიტეტიშ ჯოხოდვალაქ. კოლუმბიაშ უნივერსიტეტი ართ-ართი უდიდაში დო უჯვეშაში უნივერსიტეტი რე ამერიკას. უნივერსიტეტიქ დო თიშ მენცარეფქ მიშეღეს დიდი თია [[ნეიროკმპიუტერული ინტერფეისი]]შ, [[ლაზერი]]შ, [[მაზერი]]შ, ბირთვულ-მაგნიტური რეზონანსიშ, ბირთვული რეაქტორიშ, [[მანჰეტენიშ პროექტი]]შ დორსხუაფაშა დო გოვითარაფაშა. კოლუმბიაშ უნივერსიტეტი იკათუანს 20 მენცარულ სკოლას, მენცარული რკვიებეფიშ ცენტრეფს: [[ლამონტ-დოერტიშ დიხაუჩაშ ობსერვატორია]]ს, კოსმოსური რკვიებეფიშ გოდარდიშ ინსტიტუტის, აქსელერატორეფიშ ლაბორატორიეფს დო შხვა. კოლუმბიაშ უნივერსიტეტი რე ამერიკაული უნივერსიტეტეფიშ ასოციაციაშ დუმარსხუაფალი-მაკათური. უნივერსიტეტი რდჷ ართ-ართი მაართა ამერიკას, ნამუსჷთ უღუდჷ მედიცინაშ ოდოქტორე პროგრამა. უნივერსიტეტი ადმინისტრირენს ირწანიან [[პულიცერიშ პრემია]]ს. [[კოლუმბიაშ უნივერსიტეტიშ ბიბლიოთეკა]] რე მასუმა უდიდაში კერძო ბიბლიოთეკა ამერიკას. ბიბლიოთეკას 14,5 მილიონიშე უმოსი წინგი რე. [[2020]] წანაშ [[გჷმათუთა]]შ მუნაჩემეფით კოლუმბიაშ უნივერსიტეტიშ კურსნათებუეფი რდეს: ამერიკაშ 7 დუმარსხუაფალი მუმა, 4 ამერიკაშ პრეზიდენტი, შხვა სახენწჷფოეფიშ 29 ლიდერი, 100 ნობელიშ პრემიაშ ლაურეატი, ამერიკაშ მენცარობეფიშ ერუანული აკადემიაშ 122 მაკათური, 53 მილიარდერი, ოლიმპიადეფიშ 22 მედალისტი, ოსკარეფიშ ჯილდოშ 33 გომორძგვილი დო პულიცერიშ პრემიაშ 125 ლაურეატი.