რაჭა: გინორთი გინოჯინეფს შქას

'''რაჭა''' [[საქორთუო|საქორთუოშ]] ისტორიულ-გეოგრაფიულ მუხურ რე. იდვინუაფუ ბჟადაალ საქორთუოშ ოორუე-ბჟადაალ ნაწილს, წყარმაალ [[რიონი|რიონიშ]] დო მუშ ნადუეფიშ ლეხერს. ოორუეშე რაჭა ომძღჷ [[ოსონა|ოსონას]], ოორუე-ბჟადაალშე [[თუდოლენ შონე|თუდოლენ შონეს]], ობჟათეშე [[იმერეთი|იმერეთის]], ელახშე [[დინახალენ ქართლი|დინახალენ ქართლის]], ბჟადაალშე [[ლეჩხუმი|ლეჩხუმს]]. ისტორიულ-გეოგრაფიულ რაჭა სუმ კუნთხუთ ირთუუდჷ: გვალაშ რაჭა, ჟიმოლენრაჭა დო თუდოლენრაჭა. ამდღარ მონწყილობათ იკათუანს [[რაჭა-ლეჩხუმი-თუდოლენ შონე|რაჭა-ლეჩხუმი-თუდოლენ შონეშ]] აკანიშ [[ონი|ონიშ]] დო [[ამბროლაური|ამბროლაურიშ]] მუნიციპალიტეტეფიშ ტერიტორიეფს.

ორდოურ პერიოდეფს რაჭა [[თაკვერი|თაკვერწკჷმა]] ართო მიშეშჷ საერისთავოშა, ნამუთ [[ეგრისი|ეგრისიშ ომაფეშა]] მიშეშჷ. უკულ მიშეშჷ ლეჩხუმწკჷმა ართო რაჭა-ლეჩხუმიშ საერისთავოშა. X ოშწანურაშ ეკონიაშე იქიმინჷ რაჭაშ საერისთავოქ, ნამუშ მაართა მამართვალი (ერისთავი) რდჷ [[რატი ბაღვაში|რატი ბაღვაში]]. XIII ოშწანურაშ 80-ამ წანეფს [[დავით ნარინი|დავით ნარინქ]] გაუქვჷ საერისთავო დო თე ტერიტორია ომაფე დიხეფო გინაშქუ.