კელტეფი

კელტეფი (ლათ. Celtae, ბრეტ. Kelted, ვალ. Y Celtiaid, ირლ. Na Ceiltigh, გელურ. Ceilteach, მენ. NY Celtiee, კორნ. Kelt) - მოჯგირეეფი ნინათი დო მატერიალური კულტურათი ინდოევროპული მუმალობაშ ტომეფი, ანტიკურ ჟამს უკინებუდეს ძალამ ფაჩილი ტერიტორია ბჟადალუ დო ცენტრალურ ევროპას.

კონტაქტეფი ანტიკურ ცივილიზაციეფწკმა

კელტეფი ევროპას ართ–ართი არძაშე უშკურუ კათა რდუ. მტერიშ ოშკურნაფალო ლიმაშჟამს კელტეფი დუმაჸუნგებელო ღვარანდეს დო თაშნეშიშე გოფაჩილი რდ სალიმური ბუკიშ მეგამათ – კარნიკსეფი, ნამუშ პიჯეფით ცხოველეფიშ დუდეფიშ სახეთ რდ კეთებული.

კელტეფიშ წანა

ბერძენი ისტორიკოსი დიოდორე სიცილიარი ჭარუნდუ, ნამუდა, მტერიშ ჸვილუაჟამს, კელტი მალიმარეფი «თინეფს დუდეფს კვათუნდეს დო უკული მუშ ცხენეფიშ კისერს გინაბუნუანდეს, დო ჸუდეშა მოღალაწკმა, მინალწკმა გიობუნუანდეს. თინეფი ჩუანდეს დომარცხაფილი მტერეფიშ მოკვათილ დუდეფს კედარიშ ზეთის... დო ნამთინე დუს იცქვანდეს, დო იჩიებუდეს ნამუდა თენ წონაშ ოქროშა ხოლო ვა თირნდეს თინეფიშ დუდეფს...» საქვარი თისიე , ნამუდა კელტეფიშო დუდეფი – ორინალ შურიე. დო მტერშო დუდიშ კვათუა შანენდუ, ნამუდა თიში შური გიმორთილიე თიში სხეულიშე დო თის ვა გუმაკურცხინე... შილებე, მტერეფიშ მოკვათილი დუდეფი აკმაფგინანდეს ვარ ხვალე გამაჯვებულიშ მენორსამი ტროფეას, მარა კულტიშ ნორთისით. გონთხორუეფიჟამს როკეპერტუზის (საფრანგეთი) ძირაფილქ იუ დაბალი პორტიკი ნიშეფით, ნამუეფით რდეს ადამიერეფიშ დუდიშ ქალეფი.