ალექსანდრიაშ ოსინთუ
ალექსანდრიაშ ოსინთუ (ხოლო ჩინებული, მუჭოთ ფაროსი, ბერძ. Φάρος - ოსინთე) იდვალუაფუდჷ ალექსანდრიას, ეგვიპტეს, ეინწყუ ჯვ.წ. 279 წანას მა-3 ოშწანურას დო მოსოფელიშ შკვით სამანცარობაშ შქას ართ-ართო მირჩქინუაფუ. თიქ ფუნქციონირაფა მიოტუ დო დახე გვალო აკოციუ მა-14 ოშწანურას მოხვალამირი ჟირი ნძალიერი დიხაშ ნწალუაშ შედეგო. თიში ნოსქილედეფშა მეგორაფილქ იჸუ მანწყუაფალეფშე 1994 წანას, უკული სატელიტური ფოტოეფით ოსინთუშ დუნასქილედ ნორთეფს მიოგორეს. ოსინთუშ ჸორში საეგებიოთ 134 მეტრაშ სიმაღალაშ ოკო ჸოფედუკო დო ეთი ბორჯიშო, დიხაუჩას არსებული ადამიერიშ ენანწყუა არძაშე უმაღალაშ ნოდგჷმი ოკო ჸოფედუკო.
ჩე ქუაშ ბლოკეფით ენანწყუა ჸორში სუმ ნორთიშე აკმოდირთუდჷ: თუდოიანი თინელკუნთხამი პლატფორმა ცენტრალური ოსხირით, შქა ოქტაგონური სექცია დო ჟი კვარკვალია სექცია. ოსინთეშ დუდს დიდი სარკე რდჷ გერინაფილი, ნამუთ დღაშ გოძვენას ბჟას ეისარკუანდჷ დო თიში სინთე 100 კილომეტრის ონჭუდჷ, სერით დაჩხირს ორზანდეს. მუჭოთ ალექსანდრიაშ ზარაფხანაშ რომაულ მონეტეფს რე ებეშტილინ, ოსინთეშ პლატფორმაშ ოთხხოლო კუნთხუს ტრიტონიშ ნოჭახნაკეფი გედგჷდ. ხოლო, რომაულ პერიოდის, ჸორშიშ დუდს ხოლო ოკო გედგჷდუკო ართი ნოჭახნაკუ. გვიანო, ბრელი ორდოიანი ისლამური მეჩეთიშ მინარეთეფიშ დიზაინი ფაროსიჯგურა სუმ-სექციამი პროექტი იქიმინუაფუდ, მუთ ოსინთეშ დიდი არქიტექტურულ გენჯირაშე მიოწურუნადჷ.