ფიჭვი (ლათ. Pínus) — იროწვანე წვიწვამი ჯალეფიშ, ოშა-გოშათ გონთხაფილი ბართვეფიშ გვარი ფიჭვიშობურეფიშ ფანიაშე. თინეფიშ სიმაღალა 1,5—50 მ, მინშა 75 მ-ს (Pinus lambertiana, ოორუე ამერიკას) ონჭუ. ახალნორდი ჯაშ ბენძღი კონუსური რე, ხანერიში — მორგვალე, ქორგაშნერი. ნახვაცა ღერს სქელი დო ტომბას ციცინაფილი უღუ, ახალნორდი ნოჸელეფს — თხითხუ ფირფიტეფო იქერცუ. აკუნტარაფილ გუნაფალეფს ჟი-ჟირი, სუ-სუმი ვარდა ხუთ-ხუთი წვიწვი რე ართო (გიმნარკი რე კალიფორნიული ართწვიწვამი ფიჭვი Pinus monophylla). წვიწვის ითირანს 2—3 წანმოწანაშე ართშა. მდედრობითი კოკოლი იმონდებუ მაჟირა ვარდა მასუმა წანას, მონდინაფაშ ბორჯის ვაგმიფაჩუ, გუთმოსქიუ დო ცენს.
