ფრედერიკ ბეგბედერი, (ფრანგ. Frédéric Beigbeder, დ. 21 ეკენია, 1965, ნეილი-სურ-სენი) — ფრანგი ჭარუ, ლიტერატურული კრიტიკოსი, გჷშმაშქუმალარი.

ფრედერიკ ბეგბედერი, კრაკოვი (პოლონეთი), 2004 წ. გჷმათუთა

ბიოგრაფია რედაქტირაფა

ბეგბედერქ გონათაფა ეჭოფჷ მონტენიშ დო ლუი-ლე-გრანიშ ლიცეუმეფს. უკული გათუ პარიზიშ პოლიტიკური რკვიეფიშ ინსტიტუტი. უმაღალაში გონათაფა ეჭოფილი აფჷ მარკეტინგის ხოლო.

1990 წანას გჷმაბჟინუ მუში მაართა რომანი: „გინოლასირი ახალნორდიშ მემუარეფი“, მუშ უკულით გინმირთუ ართ-ართ დიდ სარეკლამო სააგენტოშ რედაქტორო. მუჭოთ კრიტიკოსი დო ქრონიკეფიშ ავტორინ, პარალელურო ალმახანდენს თიჯგურა ჟურნალეფწკჷმა, მუჭომეფით რე Elle, Paris Match, Voici, VSD. ოკათჷ სატელევიზიო გინოჩამეფს ლიტერატურაშ გეშა.

1994 წანას გჷშმურს მუში მაჟირა რომანი „დღახუეფი კომას“. 1997 წანას ბეგბედერი ჭარჷნს რომანს „ჸოროფა იგინძორებუ სუმ წანას“, მუშეთ რეჟისორი მარკ მარონიე ტრილოგიას გინმიღანს.

1999 წანას „გალიმარი“ გჷშმაშქვანს ნოველეფიშ კათელს „ნოველეფი ექსტაზიშ ბორჯის“.

გეჸვენჯი წანას იჭარუ ბეგბედერიშ არძაშე ჩინებული რომანი „99 ფრანკი“, ნამუსჷთ მოგვიანეთ დიო „14,99 ევრო“, უკული „6,2 ევრო“ ჯოხო. რომანს სალაფართო აფჷ ენწყჷმილი სარეკლამო სფეროშ დინოხოლენ საბზადის. ნახანდიშ გჷშულაშე ჭიჭე ხანშა ავტორი სარეკლამო სააგენტოშე გოუტუეს.

თე პერიოდის ბეგბედერქ მუში ლიტერატურული გინოჩამეფი დარსხუ საფრანგეთიშ შხვადოშხვა ტელეარხეფს, ნამუეფქჷთ მალას დიკილჷ.

2003 წანაშ ღურთუთას გჷშმაშქუმალარობა „ფლამარიონი“ გიწარზიენს ჭარუს გჷშმაშქუმალარო ქოგედირთასინ. 2006 წანაშა ბეგბედერქ გჷშაშქუ 25-შახ წინგი, მუშ უკულით „ფლამარიონწკჷმა“ თიშ ალმახანდალაქ მეჭყორდჷ.

2003 წანას ჭარუ ინტერალიეშ პრემიას ეთმეჭოფუნს რომანშე „Windows on the world“, ნამუთ ოწაწჷ 2001 წანაშ 11 ეკენიაშ ტერაქტის.

2005 წანას გჷშართჷ ბეგბედერიშ „რომანტიკოს ეგოისტიქ“, ჟირი წანაშ უკული — „ამანი, მუმეხვარით“.

ბეგბედერი ამდღარშახ რე 1994 წანას მუშ დჷნარსხუეფი ფლორიშ პრემიაშ ჟიურიშ დუდმახვენჯი. თიქ თაშნეშე დარსხუ სადიშ პრემია 2001 წანას, ლიონელ არასილწკჷმა ართო.

2005-შე 2007 წანაშახ თინა მუშენდჷ ჟურნალისტო სატელევიზიო გინოჩამას Canal+-ს. 2007 წანაშე ჟურნალ „პლეიბოიშ“ ფრანგული გჷშაშქუმალაშ ლიტერატურული კრიტიკოსიე. პარალელურო მუშენს Canal+-იშ ლიტერატურულ-კინემატოგრაფიულ გინოჩამა „წირეშ“ მაჸონაფალო. 1998 წანაშე მუშენს ლიტერატურულ ჟურნალ „Lire“-ს ხოლო.

2007 წანას გჷშართჷ „99 ფრანკიშ“ მეჯინათ აკოქიმინელ კინოფილმიქ, ნამუშ რეჟისორიე ჟან კუნენი. ფილმის ბეგბედერი ხოლო ლაჸაფენს მორჩილ ეპიზოდურ როლს.

2008 წანაშ 29 ღურთუთაშ ონჯუას ფრედერიკ ბეგბედერი ოჭოფეს მუშ მაჸალეწკჷმა ართო ნარკოტიკეფიშ ხვარებაშ გეშა. თიქ ოწმახ დაკებაშ ოკანს მუკიჸონჷ 39 სათი, მუშ უკულით თინა გოუტეს.

ნახანდეფი რედაქტირაფა

რომანეფი რედაქტირაფა

  • 1990 : გინოლასირი ახალნორდიშ მემუარეფი, გჷშმაშქუმალარი Table Ronde
  • 1994 : დღახუეფი კომას, გჷშმაშქუმალარი Grasset
  • 1997 : ჸოროფა იგინძორებუ სუმ წანას, გჷშმაშქუმალარი Grasset
  • 2000 : 99 ფრანკი (14,99 ევრო) (6,20 ევრო), გჷშმაშქუმალარი Grasset
  • 2003 : Windows on the world, გჷშმაშქუმალარი Grasset, ინტერალიეშ პრემია, 2003
  • 2005 : რომანტიკოსი ეგოისტი, გჷშმაშქუმალარი Grasset
  • 2007 : ამანი, მუმეხვარით, გჷშმაშქუმალარი Grasset

ნოველეფი რედაქტირაფა

  • 1999: ნოველეფი ექსტაზიშ ბორჯის, გჷშმაშქუმალარი Gallimard

ესსეეფი რედაქტირაფა

  • 2001: ეკონია ეკოროცხუა ლიკვიდაციაშახ, გჷშმაშქუმალარი Grasset

კომიქსეფი რედაქტირაფა

  • 2002: დოსქიდი ნორმალურქ, გჷშმაშქუმალარი Dargaud
  • 2004: დოსქიდი ნორმალურქ სენ ტროპეს, გჷშმაშქუმალარი Dargaud

რესურსეფი ინტერნეტის რედაქტირაფა