ძარწუფა

ძარწუფა (ლათ. Viburnum) — ჩხოროტყებამიშობურეფიშ ფანიაშ ჩანარიშ გვარი. უმენტაშო ფურცელმაცჷმე ბართვი ვარდა მორჩილი ჯალეფი რე. 120-200 გვარობა გოფაჩილი რე ევროპას, აზიას, ოორუე აფრიკას დო ამერიკას. ჸალერი ბართვი, ვარდა მორჩილი ზჷმაშ ჯა რე, კუმაშფერი-სისვი ხირცქილი ნახვაცათ. თიში სიმაღალა 1,5-4 მეტრშახ ანჭუ. საქორთუოს გოფაჩილი რე ტყამ აბანეფს, დახე სუბალპურ ზონაშახ. თაშნეშე მუთმოფხვადჷნა წუარმალუშ წყარპიჯეფს, კანკალეშა ბაღეფსჷთ. საქორთუოს ტყას ხვალე 3 გვარობა ჩანს; რჩქვანელობური ძარწუფა (ლათ. Viburnum opulus) 2-4 მ სიმაღალაშ ბართვი რე. ჩანარს ჩე პირი დო ჭითა გუმნაღელი უღუ (იკათუანს C ვიტამინს). ფურცელეფი ართიანიშ სააწმარენჯოთ იდვალუაფჷა, ჟილეშე რუმე წვანე რე, ხუჭილი, გიმეშე უმოსი ღილე ფურცელიშ ყერწის ოსხირწკჷმა ჟირი ძაფიშნერი წოროფურცელი უღუ. ყერწეფი ჟილე ნორთის ჯარკვალამი რე. გუმნაღელი ღილე ჭითა ფერიშ რე, ოვალური ვარდა სფეროშობური, წვენამი, 1 სმ-შახ დიამეტრიშ შხუ წკათ. ნახვაცა იკათუანს ოშაშურ ნიფთიარობეფს 2%-შახ, ფირსეფს 6,5%-შახ, ორგანულ ბჟეეფს, გლიკოზიდ ვიბურნინს, ფლავონოიდეფს, ვიტამინეფს C დო K-ს, გუმნაღელს მიარეთ რე ასკორბინიშ ბჟე, ჭაფურია, ოშაშური ღვანდეფი, ორგანული ბჟეეფი, კაროტინი, ვიტამინი PP. დეკორატიული დო ჯგირი თოფურამი ჩანარი რე.

თაშნეშე ჯგირი დეკორატიული ბართვი რე მოლოზანა (ლათ. Viburnum orientalis), ნამუთ რჩქვანელობურ ძარწუფას მოგენს. უზანი (ლათ. Viburnum lantana) ოშქაშე ზჷმაშ ბართვი რე. თიშ გუმნაღელი დუდმაართაშე წვანე რე, უკული ჭითა, მონდა უჩა დო სარსალა რე. სუმხოლო გვარობა საქორთუოს მუჭოთ ვეს, თეშ გვალას, უმენტაშო ზჷმიერ ლადარ პიჯალეფს ჩანს.

საქორთუოს ძარწუაფაშა ძახველი უჯოხონა, თუშეთის — ძეხველი.

რესურსეფი ინტერნეტის

• ძარწუფა – Viburnum (ინგლისური)