ქორთული მითოლოგია
ქორთული მითოლოგია — ჯვეში ქორთული მითეფიშ დო ისტორიეფიშ ნაკორობა, ნამუეფით ჯვეშ ქორთულ ღორონთეფს- ღორონთიშსქუალეფს დო გერგეზეფს, ხოლო ოქიანუშ მონწყუალას ოხუ. ასეიანი მარკვიებერეფი ათე მითეფს გიმირინუანა ჯვეში საქორთუოშ რელიგიური დო პოლიტიკური ინსტიტუტეფიშ მიშაგურაფალო, ხოლო ათე მითეფიშ დორსხუაფაშ ორთაშ გუმარკვიებელო. ქორთული მითოლოგია უმოსო წჷმორინელი რე ჟიპიჯური ფორმათ დო თიში მენცარული დოკუმენტირაფაქ გვარიან გვიანო დიჭყჷ (XIX-XX ოშწანურა), მორო შხვადოშხვა წყუეფით შესალებერი რე გარკვიებული დოკუმენტური მოღეშ მოგორაფა, მუთ მეშქაშალას მარზენა უმოსო ტომბას ბძირათ ქორთული მითოლოგიური ოქიანუ თიში სპეციფიური დო კარაკანო ინდივიდუალური სახეთ. ქორთულ მითეფს ენწყუმილი რე ოქიანუშ დაჭყაფუ დო შხვადოშხვა ღორონთეფიშ, დიაღორონთეფიშ, გერგეზეფიშ ვარ-და მითიური ქიმინელეფიშ რინაშ დო დუდსგინნაველეფიშ დეტალეფი. ათე ამბეეფი დუდშე ჟიპიჯურო ისიმუაფუდჷ ჟიპიჯურ-პოეტური ტრადიციათ, მორო ათეჟამო ქორთული მითეფი ჯინჯიერო ქორთული არიკეფიშე ვარ-და შხვა ლიტერატურაშე რე ჩინებული.
