ცხენიშობურეფი

ცხენიშობურეფი (ლათ. Equidae) — ბჟაშუმუეფიშ ფანიაშ ცანდჩორქოამეფიშ რანწკიშ ჩხოლარი. თინეფიშ რსხულიშ სიგჷრძა — 200-280 სმ, კუდელიში — 40-50 სმ, სიმაღალა მინდაოს — 110-146 სმ, წონა — 120-350 კგ ონჭჷ. შინური ჯიშეფიშ ზჷმა დო წონა უმოს მეტი რე. ამაღალი ბორკეფი უღჷნა, ნამუეფით ირი კითით ითებჷ, ტარკალე ნიჩვი, კინჩხის — ფოფორი, კუდელს — ძუა, რსხულიშ ფერი მუმენტაშო ართფერამი რე, მინი — ჭარჭულია რე. გოფაჩილი რენა ფართოთ. ჩხენიშობურეფი ხე სტეპეფს, სავანეფს. მაკეობა იგჷნძორებჷ 12-13 თუთაშახ. ხანს აკა ერჩქის. სქესობურო იწიფარჷნა 2-3 წანერეფი. ცხენიშობურეფიშ მუდანობა ძალამ დარკებული რე. მინი (ტარპანი, კვაგა) ეშალაფირი რე. ცხენიშობურეფი ასე წჷმორინაფილი რე ართი გვარიშ 7 გვარობათ: პრჟევალსკიშ ცხენი, ზებრა, კანჯარი დო შხვა. ცხენიშობურეფიშ ისტორია ჯგირო რე დოგურაფილი ოორუე ამერიკას, სოდე ხედეს ორდოშიანი ეოცენიშე გვიან პლიოცენშახ. ბჟაეიოლი გვერდოსფეროს ცხენიშობურეფი გოფაჩილი რე ოორუე ამერიკას ორდოშიან მიოცენს, გვიანიშ მიოცენს დო გვიანიშ პლიოცენს. ცხენიშობურეფიშ გოვითარაფაშ ისტორიას ეძღვინჷ ვლადიმერ კოვალევსკიშ კლასიკურ გჷთონაკვერუეფქ.

ლიტერატურა

• ჯანაშვილი ა., ქორთული სხუნუეფიშ ენციკლოპედია, ტ. 11, ხს. 250, ქართი, 1987 წანა.
• Ковалевский В. О., Собрание научных трудов, т. 2, М., 1956;
• Основы палеонтологии. Млекопитающие, М.,1962;
• Simpson G. G., Horses, N. Y., 1951.