ცხიმური (ლათ. Carpinus) — მარქვამი ჩანარეფიშ გვარი ჭყერიაშობურეფიშ ფანიაშე. ზარხულწვანე ჯალეფი ვარდა მაღალი ბართვეფი რე, რუმე ფერიშ გოსარსალერი დო ონდეთ დოხირცქილი ნახვაცა უღუ. ფურცელი უკაჭული, დო ჟირფაჯაკიბირა. ართსქესიანი დო ართჸუდეიანი პიოლეფი აკოშაყარელი რე გიმობუნაფილჷ ბირტყა ბიბილეფო. გიმნაღელი ართინოჸუშამი დო ართთასამი კაკალი რე. 50-შახ გვარობა გოფაჩილი რე უმნტაშო ბჟაეიოლ აზიას, ევროპას დო ოორუე ამერიკას. საქორთუოს ჩანს 2 გვარობა — კავკაციური ცხიმური დო ხერაჯი. თე 2 აბორიგენული გვარობაშ მოხ, ინტროდუცირაფილი რე ხოლო 2 გვარობა. კავკაციური ცხიმური დო კგცხიმური ედომუშამი საქორთუოს რე გოფაჩილი, გვალაშ შქა, კანკალე აბანს ჟილენი ორტყაფუეფს. ცხიმური ოროშ გინმაღე, სიტიბაშ მოჸოროფე დო მეზოფილური ჩანარი რე. ჸინი ვაზიანენს. დიხაშო მოთხუაფონი რე, მარა კანკალე გვარობა (ხერაჯი) სქირე დო წრიოკი გვალაშ კართეფს ხოლო ჩანს. აკმოქიმინუნს მუჭოთ წიმინდე, თეშ ესვარილ ჯალონას ჭუბურწკჷმა, ჭყონწკჷმა (გვალაშ გიმენი ორტყაფუს) დო წიფურწკჷმა (შქა დო ჟილენი ორტყაფუეფი) ართად. პიოლეფს ფურცელიშ გიმოღალაშე იკეთენს. გუმნაღელი გოჩანს 20 წანაშე. იმიარებუ თასით დო ძერკვიშ ეშნარდით. მარქვას გიმირინუანა მუსიკალური მიოგამალეფშო, მანქანეფაკოგაფას. ცხიმურს ჯგირო გინმუღუ კანტარუა.
