ჯონ კელჰუნი
ჯონ კოლდუელ კელჰუნი (ინგლ. John Caldwell Calhoun; დ. 18 მელახი, 1782 — ღ. 31 მელახი, 1850) — ამერიკალი პოლიტიკოსი, ააშ-იშ 7-ა ვიცე-პრეზიდენტი 1825-1832 წანეფს. რდჷ დოლმახორალაშ მოხუჯე დო ობჟათე შტატეფიშ პოლიტიკური ინტერესეფიშ მათხილარი. კელჰუნიქ პოლიტიკური კარიერა დიჭყჷ, მუჭოთ ნაციონალისტიქ, მოდერნიზატორქ, ნძალიერი ფედერალური თარობაშ დო პროტექციონიზმიშ პროპონენტიქ, მარა 1820-იან წანეფიშე კელჰუნიქ იდეეფი დითირუ დო შტატეფიშ ნებეფიშ, ლიმიტირაფილი თარობაშ, ნულიფიკაციაშ, დაბალი ტარიფეფიშ მოხუჯეთ გინირთჷ. თიში იდეეფქ კაბეტი გოლინა იღვენუ ობჟათე შტატეფიშ სეცესიონიზმიშა 1861-1865 წანეფს. ამერიკაშ ისტორიას კელჰუნი რდჷ მაართა ვიცე-პრეზიდენტი, ნამუქჷთ პოსტიშე გინოდირთუნჷ.
_-_Google_Art_Project.jpg)
კელჰუნიშ პოლიტიკური კარიერაქ დიჭყჷ 1810 წანას, მუჟამსჷთ თიქ გიშაგორილქ იჸუ ააშ-იშ წჷმმარინაფალეფიშ პალატაშ მაკათურო. ჯეიმზ მონროშ ადმინისტრაციას კელჰუნის უკინებუდჷ ააშ-იშ ოურდუმე მელამოსეშ პოსტი. მონაწილენდჷ 1824 წანაშ ააშ-იშ საპრეზიდენტო გიშაგორუეფს, მარა პოპულარობაქ ვეიაჭოფუ. უკულ ვიცე-პრეზიდენტობაშ კანდიდატო გინირთჷ. ჸათე პოსტის ნინალენდჷ ჯონ ქუინსი ადამსიშ დო გეჸვენჯი პრეზიდენტიშ ენდრიუ ჯექსონიშ ადმინისტრაციეფს. კელჰუნის გლახა ურთიართალა უღუდჷ ჯექსონიწკჷმა. ჸათე გლახა ურთიართალაშ ართ-ართი ბაძაძი ნულიფიკაციაშ კრიზისი რდჷ, ნამუქჷთ 1832-1833 წანეფს მოხვადჷ. ობჟათე კაროლინაქ, შტატიშ ტერიტორიას, ფედერალური ტარიფეფი ვაკონსტიტუციურო გეგმაცხადჷ, მარა ააშ-იშ უჟინაში სასამართალოქ ნულიფიკაციას ხუჯი ვადუკინჷ. ვართი, ჯექსონს გინუდგუმუ შანულამი ნაბიჯი ტარიფეფიშ დარკებაშო. ჸათეშ გეშათ გეუფრაშჷ ჯექსონიშ ურთიართალაქ კელჰუნიწკჷმა, ნამუთ ობჟათე კაროლინაშე რდჷ დო ნამუთ ნულიფიკაციაშ პოლიტიკაშ სერიოზული მოხუჯე რდჷ. 1832 წანაშ ქირესთუთას, კელჰუნიქ ვიცე-პრეზიდენტობაშე გეგნოდირთჷ დო უკულ კარიერა სენატის გაგინძორჷ, სოდეთ უმოს ეფქეტურო ლჷმენდჷ ნულიფიკაციაშო.
1844-1845 წანეფს კელჰუნი მოღალენდჷ ააშ-იშ სახენწჷფო მელამოსეთ, ჯონ ტაილერიშ ადმინისტრაციას. ჸათე ბორჯის, კელჰუნიქ ხუჯი დუკინჷ ტეხასიშ ანექსიას. 1845 წანაშ გერგობათუთაშე კელჰუნიქ დართჷ სენატის, სოდეთ თინა ოპონირენდჷ ამერიკა-მექსიკაშ ლჷმას დო 1850 წანაშ კომპრომისის. ჯონ კელჰუნიქ ღურუ 1850 წანაშ 31 მელახის, 68 წანერქ, ტუბერკულოზით.