ჰონორიუსი

ჰონორიუსი (ლათ. Flavius Honorius Augustus; დ. 9 ეკენია, 384 — ღ. 15 მარაშინათუთა, 423) — ბჟადალი რომიშ იმპერატორი 393-423 წანეფს, თეოდოსიუსეფიშ დინასტიაშ წჷმმარინაფალი. რდჷ თეოდოსიუს I-შ დო თიში ალმასქუ ელია ფლაცილაშ უკულაში ქომოლსქუა. 393 წანაშ 23 ღურთუთას, თეოდოსიუსიქ ჰონორიუსი ავგუსტუსო გეგმაცხადჷ. მუამუშიშ ღურაშ (395 წანაშ 17 ღურთუთა) უკულ, ვითი წანერი ჰონორიუსიქ ბჟადალი რომიშ იმპერიაშ ხვალახე მამართალო გინირთჷ. ბჟაეიოლს მართუნდჷ უნჩაში ჯიმა არკადიუსი.

ჰონორიუსი Honorius
ჰონორიუსიშ გჷმოხანტუა კონსული პრობუსიშ დიპტიქის, 406 წ.
ბჟადალი რომიშ იმპერატორი
პოსტის გერინაშ ბორჯი
23 ღურთუთა, 393 – 15 მარაშინათუთა, 423
წიმოხონი	თეოდოსიუს I
მონძე	იოანე
დუნაბადი	9 ეკენია, 384 კონსტანტინოპოლი, რომიშ იმპერია
ნაღურა	მარაშინათუთა 15, 423 (38 წანერი) რავენა, იტალია
ნთხორუ აბანი	ჯეგე პეტრეშ ბაზილიკა
მუმა	თეოდოსიუს I
ნანა	ელია ფლაცილა
ალმასქუ	1. მარია 2. ტერმანცია
რელიგია	ნიკეაშ ქირსიანობა

მართუალაშ დაჭყაფური წანეფს რეალური ხეშუულება უკინებუდჷ ჯარეფიშ მანჯღვერთარს სტილიქონს. 398 წანას ჰონორიუსიქ ოსურო ქიმიჸონჷ სტილიქონიშ ცირასქუა მარია. მარიაშ ღურაშ უკულ ჰონორიუსიქ ოსურო ქიმიჸონჷ მარიაშ უკულაში და ტერმანცია. 408 წანაშ მარაშინათუთას ჰონორიუსიქ სტილიქონს გითოჩამა ქეკადვუ დო დაჸვილაფუ. თაშნეშე, დეთხინუ ტერმანცია.

ჰონორიუსიშ მართუალაშ ბორჯის, 406 წანას ბარბაროსული ტომეფქ ვანდალეფქ, ალანეფქ დო სვებეფქ გორჩვეს გალია დო უკულ ესპანეთიშა გემშეჭკირეს. 410 წანას ვესტგოთეფქ, ალარიხიშ ხემანჯღვერობათ რომი გეჭოფეს. ჰონორიუსიქ რავენაშა ინტუ. ჰონორიუსიშ მართუალაშ ბორჯის ფშხირი რდჷ არყებეფი. 409 წანას დუდი იმპერატორო გეგმაცხადჷ უზურპატორი პრისკუს ატალუსიქ. ჟირი წანათ ადრე, 407 წანას რომიშ პროვინცია ბრიტანეთის იმპერატორო გეგმაცხადეს კონსტანტინე III.

ჰონორიუსი მერჩქინელი რე ართ-ართი დაღარი იმპერატორო რომიშ ისტორიას. თიქ ღურუ 423 წანაშ 15 მარაშინათუთას, 38 წანერქ. მონძე ვადოსქილადჷ. ინტერრეგნუმიშ ბორჯის პატრიციეფქ ახალი იმპერატორო გეგმაცხადეს იოანე, ნამუთ ლეგიტიმურო ვეჩინჷ ბჟაეიოლიშ იმპერატორქ თეოდოსიუს II-ქ. ქიდიჭყჷ ომენოღალე ლჷმაქ, ნამუშ შედეგო იოანე გეგთარაგვეს.

ლიტერატურა

• ენციკლოპედია ბრიტანიკა