აკროპოლისი
აკროპოლისი (ბერძ. ἀκρόπολις > ἀκρόs — ჟინი, πολις polis — ჯიხა) ჯვეში ბერძენული ნოღაშ არძოშე მაღალი დო გომანგარაფილი ნორთი, თ. გ. ჟინი ნოღა. ნოღაშ რელიგიური დო პოლიტიკური ცენტრი. აკროპოლისი რდჷ მაართა დოხორინელი აბანი. თიშ გოხ იკიდუდჷ ნორკებო თხილერი თ. გ. გიმენი ნოღა. აკროპოლისი წჷმარინუანდჷ ჯიხაზურგას, ნამუსჷთ ლჷმალაშ ბორჯის დუც მჷკმაფორუანდჷ ნოღაშ მახორობა. თაქ ნოღაშ მათხილე ღორონთეფიშ ჯოხოშა ოხვამეეფს ეთმიოგანდეს. აკროპოლისეფიშ აკნაცჷმეფს (მიკენიშ, ათენიშ, არგოსიშ დო შხვა) ნაძირეფი რე მატერიალური კულტურული მიარე ძეგლი. გჷშაკერძაფილო ეიოშანალიე ათენიშ აკროპოლისიშ არქიტექტურული დო ნოჭახნაკუშ სათოლიო მინუშეფი (დოხოლაფირო ჯვ. წ. V ოშწანურა), ნამუეფიშ დიდი ნორთი მილაძჷ ბრიტანეთიშ მუზეუმს. ათენიშ აკროპოლისის დორსხუაფილი რე არქეოლოგიური ტყაჩირი დო მუზეუმი.
აკროპოლისი — მარგალურო დინოხჯიხა, ჟინჯიხა, ჟინინოღა — უღუდეს ჯვეში ქორთული ნოღეფსჷთ: მცხეთას, ქართის, ქუთეშის, არქეოპოლისის, ანაკოფიას, ვანს დო თ. უ. ბერძენი ისტორიკოსი დიონ კასიოს კოკეინი (155 ვარა 164-229) დუდიშ „რომიშ ისტორიას“ აკროპოლისო იშინუანც მცხეთაშ დინოხჯიხას (ჟინჯიხას), თინა მითხობელანა, ნამდა ჯვ. წ. 65 წანას რომლეფიშ მანჯღვერი გნეუს პომპეუსიქ იბერიაშა გემშეჭკირჷ დო ქჷმიოჭირინუ აკროპოლისშახ. მცხეთაშ თე ნორთის არმაზციხე ჯოხოდჷ.
აკროპოლისის მუჭოთ წესინ, ირო გედგჷდ ნოღაშ მათხილე ღორონთიშ ოხვამე. არძოშე უმოსო ჩინებულიე ათენიშ აკროპოლისი, ნამუთ მიშაღალირიე მოსოფელიშ მონძალაშ ობიექტეფიშ ერკებულშა.
ლიტერატურა
რედაქტირაფა- ქორთული სხუნუეფიშ ენციკლოპედია, ტ. 1, ხს. 255, ქართი, 1975 წანა.
რესურსეფი ინტერნეტის
რედაქტირაფა
- The Acropolis of Athens (Greek Government website)
- The Acropolis Restoration Project Archived 2007-11-01 ვებ-ხასჷლას Wayback Machine. (Greek Government website)
- The Restitution of the Parthenon Marbles
- UNESCO World Heritage Centre — Acropolis, Athens
- Acropolis Friends
- AcropolisofAthens.gr
- Acropolis of Athens travel guide Archived 2011-09-04 ვებ-ხასჷლას Wayback Machine.
- Acropolis Museum Archived 2010-05-07 ვებ-ხასჷლას Wayback Machine.
- Marbles Reunited - The British Campaign to Return the Parthenon Marbles to Athens Archived 2012-01-18 ვებ-ხასჷლას Wayback Machine.
- Acropolis: description, photo album