ალბერტ გიორსო
ალბერტ გიორსო (ინგლ. Albert Ghiorso; დ. 15 კვირკვე, 1915, ვალეხო, კალიფორნია, ააშ — ღ. 26 ქირსეთუთა, 2010, ბერკლი, კალიფორნია, ააშ) — ამერიკალი მენცარი.
| ალბერტ გიორსო | |
| ინგლ. Albert Ghiorso | |
 | |
| დაბადებაშ თარიღი: | |
|---|---|
| დაბადებაშ აბანი: | |
| ღურაშ თარიღი: |
ქირსეთუთა 26, 2010 (95 წანერი) |
| ღურაშ აბანი: |
ბერკლი, კალიფორნია, ააშ |
| მენოღალობა: | |
| ომენცარე სფერო: |
ბირთვული ფიზიკა |
| სამუშაშ აბანი : | |
| ალმა-მატერი: |
კალიფორნიაშ უნივერსიტეტი (ბერკლი) |
| ჯილდოეფი დო პრემიეფი: |
ჰოვარდ პოტსიშ მენდალი (1969) |
ბიოგრაფია დო მენცარული რკვიებეფი რედაქტირაფა
ალბერტ გიორსოქ დებადჷ 1915 წანაშ 15 კვირკვეს, კალიფორნიაშ ნოღა ვალეხოს. გურაფულენდჷ ინჟინერიას, კალიფორნიაშ უნივერსიტეტის (ბერკლი). გურაფაშ თებაშ უკულ გეჩინებაფუ გიშარჩქინელი ქიმიკოსი გლენ თეოდორ სიბორგი, ნამუთ ჸათე პერიოდის მუშენდჷ კალიფორნიაშ უნივერსიტეტიშ რადიაციულ ლაბორატორიას. 1940-იან წანეფს სიბორგიქ ომუშებუშა ჩიკაგოშა გეგნორთჷ, სოდეთ მანჰეტენიშ პროექტიშო მუშენდჷ. სიბორგიქ ომუშებუშა გიორსო ხოლო მიდეჸონჷ. ჸათე პერიოდის ალბერტ გიორსოქ ძირუ დო გიმირკვიუ ელემენტეფი ამერიციუმი დო კიურიუმი. მაჟირა მოსოფელიშ ლჷმაშ თებაშ უკულ, სიბორგიქ დო გიორსოქ ბერკლიშა გინილეს. ბერკლიშ უნივერსიტეტიშ ლაბორატორიას ციკლოტრონეფიშ გიმორინაფათ, 1949-1950 წანეფს, მეღებულქ იჸუ ელემენტეფქ ბერკელიუმიქ დო კალიფორნიუმიქ. 1953 წანას გიორსოქ დო თიშ კოლეგეფქ მიოგორეს ელემენტეფს აინშტაინიუმის დო ფერმიუმის. 1955 წანას ციკლოტრონიშ გიმორინაფათ მეღებულქ იჸუ ახალი ელემენტიშ მენდელევიუმიშ 17 ატომქ. 1950-იან წანეფს გიორსოშ ხემანჯღვერობათ ბერკლის აკიგჷ მონკა იონეფიშ ღოზოვან აქსელერატორქ (HILAC). ჸათე აქსელერატორიშ გიმორინაფათ უკულ იკეთინჷ ელემენტეფიშ ნობელიუმიშ, ლოურენსიუმიშ, რეზერფორდიუმიშ, დუბნიუმიშ დო სიბორგიუმიშ დიო მეღებაქ დო უკულ იდენტიფიკაციაქ. 1970-1980-იან წანეფს ბერკლის, მენცარულ რკვიებეფქ დერკუ. მარა 1990-იან წანეფშე ბერკლიშ ლაბორატორიაქ დიჭყჷ მენცარული კოლაბორაცია დარმშტადტიშ ლაბორატორიაწკჷმა, გერმანიას. ბერკლიშ დო დარმშტადტიშ ლაბორატორიეფიშ მენცარული კოლაბორაციათ, მეღებულქ იჸუ დო იდენტიფიქირებულქ ელემენტეფქ: დარმშტადტიუმიქ, რენტგენიუმიქ დო კოპერნიკიუმიქ. ალბერტ გიორსოქ აკიმუშუ შხვადოშხვა მეთოდეფი ახალი ელემენტეფიშ იზოლაციაშო დო იდენტიფიკაციაშო. ართ-ართი ტექნიკა რდჷ მულტიფუნქციური ანალიზატორი. გიორსოქ აკიმუშუ ახალი ტიპიშ აქსელერატორიშ ომნიტრონიშ კონცეფცია ხოლო, მარა ომნიტრონიშ პროექტიქ ბერკლის ვეკეთინჷ, 1970-იან წანეფს ამერიკაშ პოლიტიკური ლანდშაფტიშ თირუაშ გეშა. ჸათე პერიოდის ამერიკაშო ბირთვული რკვიებეფი პრიორიტეტი ვარდჷ.
ელემენტეფი რედაქტირაფა
ელემენტეფი, ნამუეფიშ ძირაფაშა დო იდენტიფიკაციაშა ალბერტ გიორსოქ, დიდი თია მიშეღჷ
- ამერიციუმი 1945 წანას (ელემენტი 95)
- კიურიუმი 1944 წ. (ელემენტი 96)
- ბერკელიუმი 1949 წ. (ელემენტი 97)
- კალიფორნიუმი 1950 წ. (ელემენტი 98)
- აინშტაინიუმი 1952 წ. (ელემენტი 99)
- ფერმიუმი 1953 წ. (ელემენტი 100)
- მენდელევიუმი 1955 წ. (ელემენტი 101)
- ნობელიუმი 1958-59 წწ. (ელემენტი 102)
- ლოურენსიუმი 1961 წ. (ელემენტი 103)
- რეზერფორდიუმი 1969 წ. (ელემენტი 104)
- დუბნიუმი 1970 წ. (ელემენტი 105)
- სიბორგიუმი 1974 წ. (ელემენტი 106)
რესურსეფი ინტერნეტის რედაქტირაფა
- ალბერტ გიორსო - ვებსაიტი
- ბიოგრაფიული დო მენცარული ფაქტეფი Archived 2020-02-12 ვებ-ხასჷლას Wayback Machine.