ალფრედ დიობლინი
ბრუნო ალფრედ დიობლინი (გერმ. Bruno Alfred Döblin; დ. 10 მარაშინათუთა, 1878, შტეტინი, გერმანიაშ იმპერია — ღ. 26 მანგი, 1957, ემენდინგენი, გერმანია) — გერმანალი ჭარუ, ნოველისტი, ესეისტი დო ექიმი.
| ალფრედ დიობლინი | |
 | |
| ფსევდონიმი: |
Linke Poot |
|---|---|
| დაბადებაშ თარიღი: | |
| დაბადებაშ აბანი: | |
| ღურაშ თარიღი: |
მანგი 26, 1957 (78 წანერი) |
| ღურაშ აბანი: | |
| ერუანობა: | |
| საქვარუა: | |
| Magnum opus: |
ვან-ლუნიშ სუმი ნასხაპა (1916) |
| ჟანრი: |
რომანი, ესე |
| ნინა: | |
| ჯილდოეფი: |
ბავარიაშ აკადემიაშ მეჯინური ხელუანობეფიშ ლიტერატურული პრემია (1957) |
|
| |
დებადჷ გერმანიაშ ნოღა შტეტინს (ასეიან პოლონეთი), ასიმილირებული ურიეფიშ ფანიას. ვითი წანერი რდუნ თეშ მუმაქ ქიმიოტუ დო უმოსო დიდა რდუნდჷ. დიობლინი გურაფულენდჷ მედიცინას ბერლინიშ უნივერსიტეტის. გურაფაშ თებაშ უკული მუშენდჷ ექიმო შხვადოშხვა კლინიკეფს.
ალფრედ დიობლინიქ ჭარალუათ ორდოიანი წანეფიშე დეინტერესჷ. მაართა ნაწარმებეფი 1910-იან წანეფიშე გჷმაბჟინუ. თიში ლიტერატურული კარიერა იგინძარებუდჷ დოხოლაფირო გვერდი ოშწანურაშ გოძვენას დო იკათუანდჷ შხვადოშხვა ლიტერატურული სტილს დო ჟანრის. დიობლინი რე ავტორი ისტორიული რომანეფიშ, ომენცარე ფანტასტიკაშ ჟანრიშ ნოველეფიშ, პიესეფიშ, სცენარეფიშ, ფილოსოფიური ტრაქტატეფიშ, პოლიტიკური ესეეფიშ, მენცარული სტატიეფიშ დო შხვა. დიობლინი მერჩქინელი რე გერმანული მოდერნისტული ლიტერატურაშ ართ-ართ უკაბეტაშ წჷმმარინაფალო.
1929 წანას გიშართჷ დიობლინიშ არძაშე უმოსო შანულამი ნახანდიქ, რომანქ ბერლინი, ალექსანდერპლაცი, ნამუქჷთ ავტორს დიდი პოპულარობა მოუღჷ. უკულიანი პერიოდის წინგიშ სიუჯეტის გიარსხუ შხვადოშხვა კინოფილმეფქ. 2002 წანაშ გჷმოკითხირით, რომანი მიშაღალირი რე არძო ბორჯიშ ოში საუჯგუშო წინგიშ ერკებულშა. დიობლინიშ შხვა ნახანდეფშე ეიოშანალი რე: ისტორიული რომანეფი: ვან-ლუნიშ სუმი ნასხაპა (1916), ვალენშტაინი (1920), ომენცარე-ფანტასტიკური რომანი ზუღაშ გვალეფი დო გიგანტეფი (1924), რომანეფიშ ტეტრალოგია 1918 წანაშ გერგობათუთა: გერმანიაშ რევოლუცია (1939-1950), კომედიური რომანი ვადცეკიშ ლჷმა ორქიშ ტურბინაწკჷმა (1918) დო შხვა. დიობლინიშ ეკონია რომანი რე გინძე სერიშ ანბეეფი, ნამუქჷთ ავტორიშ ღურაშ ართი წანაშ წოხოლე გიშართჷ.
გერმანიაშ ხეშულობაშა ნაცისტეფიშ მულაშ უკულ, დიობლინიქ გერმანია ქიდიტუ დო ოცხოვრებშა საფრანგეთიშა მიდართჷ. ნაცისტური გერმანიას დიობლინიშ, თაშნეშე ბერტოლტ ბრეხტიშ, ლიონ ფოიხტვანგერიშ დო შხვა ავტორეფიშ ნაჭარეფი მერჩქინელი რდჷ მუჭოთ ასფალტიშ ლიტერატურა.
გიშნაგორა ნაჭარეფი რედაქტირაფა
- ბერდენა ცხენეფი, უჩა ფარდა დო შხვა თხობელუეფი
- ვან-ლუნიშ სუმი ნასხაპა (1916)
- ვადცეკიშ ლჷმა ორქიშ ტურბინაწკჷმა (1918)
- ვალენშტაინი (1920)
- ზუღაშ გვალეფი დო გიგანტეფი (1924)
- ჟირი მაჸალეშ ჸვილუა (1924)
- მანასი: ჰიმალაიური ეპოსი (1927)
- მა, ორთაშ ჟიდო (1927)
- ბერლინი, ალექსანდერპლაცი (1929)
- შარალუა პოლონეთის (1925)
- დიარა
- ჩქინი რინა (1933)
- ბაბილონური ტანტარი (1934)
- ამაზონიშ ტრილოგია
- 1918 წანაშ გერგობათუთა: გერმანიაშ რევოლუცია (1939-1950)
- უღურალი კოჩი (1946)
- პოლკოვნიკი დო პოეტი
- ჸვაიჭარაშ შარალუა (1949)
- გინძე სერიშ ანბეეფი (1956)
- ნერე ჸარაფი
- ლიტერატურული ესეეფი
რესურსეფი ინტერნეტის რედაქტირაფა
- ალფრედ დიობლინიშ ჯარალუა
- ალფრედ დიობლინი ენციკლოპედია ბრიტანიკას
- ალფრედ დიობლინი - ნახანდეფი პროექტ „გუტენბერგის“
- (ინგლისური) ალფრედ დიობლინი — კინოფილმეფიშ ინტერნეტ მუნაჩემეფიშ ბაზას