ბეჟან I დადიანი

ბეჟან I დადიანი (ღ. 1728, გეგუთი) — ოდიშიშ თარი 1715-1728 წანეფს, გიორგი II ლიპარტიანიშ ქომოლსქუა. 1704 წანაშე იკოროცხუდჷ "ლეჩხუმიშ პატჷნო". 1714 წანას მუამუში ოჭოფჷ, თიში "მენანდვეფი" გეშაჭყვიდჷ დო დადიანო გჷნირთუ. ხეტეშე ოცადუდჷ გუჭყანიერებუდუკო მუში ხეშუულობან, გუძინუდუკო ოდიშიშ სათაროშან, ლიხთიმერეთის პირველობა დუინალაფუდუკონ დო გეგნუჸოთანუდუკო ოსმალეფინ. 1717 წანას ოკათუდჷ გურიაშ სათაროს გიორგი IV გურიელიშ ხვისტაშე გითორაგვაფას დო ქაიხოსრო III გურიელიშ გოთარაფას. გიშაკერზაფილო გიჭყანიერჷ 1720-1721 წანეფს, მუჟანსჷთ იმერეთის ახალას გომაფაფილჷ ალექსანდრე V-შ მინჯება ხეშა ქეშიჸოთჷნ. ახალნორდი მაფას თიქ ოსურო ქეკუხუნუ მუში ცირასქუა მარიამი დო 1721-1728 წანეფს ფაქტობურო განაგენდჷ იმერეთიშ ომაფეს. ანდაშა მეფაშ ჸვილუათ ულამუდჷ, მარა ვამახუჯინჷ. ალექსანდრე V ოცადუდჷ გუჭოფუდუკო თიში სიჭყანიარან. ვართ ოსმალეთიშ ხემანჭუეფს მოწონდეს გაჭყანიერებული ვასალი, ნამუსჷთ რუსეთიშ ხუჯიშ ალარინალაშ გეთმიწამენდესჷნ. ბეჟან I დადიანი დოჸვილეს ოსმალეფქ გეგუთის.

	„ႭႨႥ. აქა დადიანი ბეჟან მოკლეს თათართა.“
	(შემოქმედის გულანი)

ლიტერატურა

• სოსელია ო., ქორთული სხუნუეფიშ ენციკლოპედია, ტ. 2, ხს. 311, ქართი, 1977 წანა.