ბერტონ რიხტერი
ბერტონ რიხტერი (ინგლ. Burton Richter; დ. 22 მელახი, 1931, ბრუკლინი, ნიუ-იორკი, ააშ — ღ. 18 კვირკვე, 2018, სტენფორდი, კალიფორნია, ააშ) — ამერიკალი ფიზიკოსი. 1974 წანას ერუანული აქსელერატორული ლაბორატორია SLAC-იშ დო ბრუკჰეივენიშ ერუანული ლაბორატორიაშ მენცარეფქ, რიხტერიშ დო სემიუელ ტინგიშ ხემანჯღვერობათ, ძირეს J/ψ-მეზონი. ჸათე ძირაფაშ გეშა ჟირხოლო მენცარს, რიხტერს დო ტინგის გინოჩეს ნობელიშ პრემია ფიზიკაშ დარგის 1976 წანას.
| ბერტონ რიხტერი | |
| ინგლ. Burton Richter | |
 | |
| დაბადებაშ თარიღი: | |
|---|---|
| დაბადებაშ აბანი: | |
| ღურაშ თარიღი: |
კვირკვე 18, 2018 (87 წანერი) |
| ღურაშ აბანი: |
სტენფორდი, კალიფორნია, ააშ |
| მენოღალობა: | |
| ომენცარე სფერო: | |
| სამუშაშ აბანი : |
სტენფორდიშ უნივერსიტეტი |
| ალმა-მატერი: | |
| ომენცარე ხემანჯღვერი: |
ბერნარდ ფელდი |
| ჯილდოეფი დო პრემიეფი: |
ერნესტ ლოურენსიშ პრემია (1975) |
ბიოგრაფია რედაქტირაფა
ბერტონ რიხტერქ დებადჷ 1931 წანაშ 22 მელახის, ბრუკლინს, ნიუ-იორკის, ურიეფიშ ფანიას დო ირდუდჷ ქუინსის. რიხტერი გურაფულენდჷ ფარ-როკევეიშ სკოლას, უკულ მერსერსბერგიშ აკადემიას, პენსილვანიას. აკადემიაშ უკულ რიხტერქ გურაფა გაგინძორჷ მასაჩუსეტსიშ ტექნოლოგიაშ ინსტიტუტის, სოდეთ მიპალუ მენცარობაშ ბაკალავრიშ ხარისხი 1952 წანას დო უკულ დოქტორიშ ხარისხი ხოლო, 1956 წანას. გურაფაშ თებაშ უკულ მუშენდჷ სტენფორდიშ უნივერსიტეტის დო რდჷ სტენფორდიშ უნივერსიტეტიშ ფიზიკაშ პროფესორი. 1984-1999 წანეფს რიხტერი რდჷ ერუანული აქსელერატორული ლაბორატორია SLAC-იშ დირექტორი. სტენფორდიშ უნივერსიტეტიშ მუშობაშ ბორჯის რიხტერქ, სტენფორდიშ უნივერსიტეტიშ ფიზიკაშ პროფესორიშ დევიდ რიტსონიშ მოხვარებათ, ეიოგჷ SPEAR-აქსელერატორი. ჸათე აქსელერატორიშ გიმორინაფათ იძირუ მეზონქ, ნამუსჷთ რიხტერქ გიოდვუ ψ (ფსი). ჸათე მეზონქ იძირუ ბრუკჰეივენიშ ერუანულ ლაბორატორიას ხოლო, სემიუელ ტინგიშ ხემანჯღვერობათ. სემიუელ ტინგიქ მეზონს გიოდვუ J. ჸათავრეშე მორთჷ ჯოხოდვალაქ J/ψ-მეზონი. 1976 წანას რიხტერს დო ტინგის მიაჩჷ ნობელიშ პრემიაქ. ბერტონ რიხტერი 1975 წანას CERN-ის ხოლო მუშენდჷ. რიხტერი რდჷ შხვადოშხვა აკადემიეფიშ მაკათური დო პრემიეფიშ ლაურეატი. 1975 წანას რიხტერქ მიპალუ ერნესტ ლოურენსიშ პრემია, 2012 წანას ენრიკო ფერმიშ პრემია. 2012 წანას ააშ-შ პრეზიდენტიქ ბარაკ ობამაქ რიხტერს გინოჩჷ პრესტიჟული მენცარობაშ ერუანული მენდალი. ბერტონ რიხტერქ ღურუ 2018 წანაშ 18 კვირკვეს, სტენფორდის, 87 წანერქ.
რესურსეფი ინტერნეტის რედაქტირაფა
- The Nobel Prize in Physics 1976
- Richter Burton, Nobel Luminaries Project, The Museum of the Jewish People at Beit Hatfutsot
- SLAC Flickr album
- Historical photos of Burton Richter
- Honoring Burton Richter at APS April 2019