ბოლივუდი
ბოლივუდი (ინგლ. Bollywood) — ააშ-შ კინემატოგრაფიაშ, ჰოლივუდიშ (Hollywood) ანალოგიაშა აკოქიმინელი ჯოხოდვალა, ნამუქჷთ ინდოეთიშ ნოღა ბომბეიშ (ასე მუმბაი) კომერციულ კინემატოგრაფიას მიაჩჷ.
მაართათ ჰოლივუდიშ დო ბომბეიშ თე აკოსვარილი ჯოხოდვალეფით ბომბეიშ კინომატოგრაფია ართ-ართ ინდოარ კინოკრიტიკოსიქ 1970-იან წანეფს დონათჷ, ნამუთ თიქ ბოლივუდიშ კომერციულ-ბორჯიშ ოღალი პოლიტიკა კალიფორნიულ ჰოლივუდის ცინიკურო ალუზჷმუ, მარა თე ჯოხოდვალაქ ქჷდოსქიდჷ დო ინდური კინოშ სინონიმო გჷნირთჷ. ინდოარი პატრიოტეფი ჯოხოდვალა „ბოლივუდიშ“ აწმარენჯეფი რენა, თიშ გეშა, ნამჷ-და თინეფიშ მოარზებათ ინდურ ფილმეფს ჰოლივუდწკჷმა საართო მუთუნი ვაუღუ.
ირ წანმოწანას ბოლივუდის დოხოლაფირო 250 თარო ბორჯიშოღალი, უხარისხო, ნოჩქარებო გჷნოღალირი კომერციული ფილმი იკეთებუაფუ, ნამუქჷთ ინდურ კინომატოგრაფიას, ნამუთ ვარე ხვალე ბოლივუდი, მოსოფელს ჯოხო გუტახჷ.
ბოლივუდიშ ფილმეფს მუსხირენ დჷმახასიათაფალი მუშობურობეფი უღუნა: თინეფიშ უმენტაშობა მიუზიკლი რე — ფილმიშ სიუჟეტის ინმიხუნუაფუ მუსიკალური კლიპეფი (კანკალეშა თინეფიშ მუდანობა ვითშახ რე), ჟირ სერიათ გორთილი ფილმი დოხოლაფირო ოთხი სათი იგჷნძორებუ. მარა ფილმეფიშ სიუჟეტეფი შხვადოშხავნერი რე, თინეფს გჷმირინუაფუ ინდური კლასიკური თეატრიშო დჷმახასიათაფალი თემეფი - სიჯგირეშ სიგლახეწკჷმა ლჷმა, ავი დიანთილი დო დოდარელი ნოსა, დაღარი დო დიდარი, მუსლიმან დო ინდუისტ გერგეზეფს შქას ჸოროფაშ გომორძგუალა, ადამიერიშ ღირსებაშ ამარდებელი ტრადიცეფიშ გჷნოღალა დო კასტური სისტემაშ ბორკილეფიშ ვადიჸუნაფა დო შხვა.
ბოლივუდიშ პროდიუსერეფი ხანდენა მუჭოთ ინდოეთის, თაშენშე ედომუშამ აზიაშ დო აფრიკაშ ფართო მასეფშო დო აკმოქიმინუნა თ.გ. „კინოს ედომუშამი ოჯახიშო დიდშე ჭიჭეშახ“, თეშ გეშა ეროტიული მომენტეფი, გიშაკერზაფილო ოსურიშ დო ქომოლკოჩიშ პიჯიშ ჯუნა ფილმს ტაბუ რე. თეჸურე ონდეთ გებენი ფილმეფი აზია-აფრიკაშ მუსლიმანი, ინდუისტი დო თ.უ. მაჯინუშ კონწარ კრიტიკას უხვადუ.
ბოლივუდი გოვითარაფონ ინდოეთის, ნამუშ მახორობაშ უმენტაშობა სიდაღარაშ ხურგას არსებენსჷნ, სქვამი, ჩეკანამი, წჷმოძინელი ადამიერიშ კულტის ონინალჷ, თაშნეშე ჩე დო უჩაკანამ მახორობას, შილებე — უნებური, ართიანშოთ უწამებუობას თასჷნს, ნამუთ თინა იროთ ბჟადალიშ კინოკრიტიკაშ ნოტას იინალუანს.
ეიოშანალი რე, ნამჷ-და მიარე ნარჯიშ უმკუჯინალო, ბომბეიშ კინომატოგრაფიაშ წჷმოძინელი მინუშეფი (სამანგ. „დევდასი“) დუბლირაფილი რე ევროპაშ მიარე ნინაშა დო რეგულარულო გჷნმიჩამუაფუ ბჟადალიშ ეთერს.
|
თე სტატია კინოშ გეშა დიოდღარო მერკე რე. თქვა შეგილებუნა ქუმმეხვარათ დო აკაფშათ თინა. |
|
კინოშ პორტალი – ქოძირით ვიკიპედიაშ შხვა სტატიეფი კინოშ გეშა. |