ბუშმენეფი

ბუშმენეფი — ბუშმენეფი, ნამუეფსჷთ სანიშ ტომსჷთ უძახჷნა, ობჟათე აფრიკას მახორუ კათეფიშ ბუნა რე. თინეფიშ უმენტაშალა კალაჰარიშ ტიოზიშ გოხოლუას, ბოტსვანას დო ნამიბიას ოხორანს. სანიშ ტომიშ მაკათურშე მინი ფერმეფს მუშენს, შხვეფი — გეგიათ რე. ბუშმენეფიშ ართამ მუდანობა დოხოლაფირო 100 000 ადამიერს აკმადგინანს. გეგიეფი 25–30 კოჩიან ბუნეფო ოხორანა დო მაჯინობათ დო შაყარუათ ისქილიდუანა დუდს. თინეფს უჩქჷნა, მუჭო გჷთიღან დუდი ტიოზიშ კონწარ პიჯალეფს დო შეულებჷნა თიჯგურა აბანეფს მიპალან ოჭკომალ-ოშუმალ, სოდე ითამ მუთუნ ვარე ქვიშაშ დო ბართვონიშ მოხ.

ბუშმენეფი
დოხოლ. 100 000
რეგიონეფი შანულამი მახორობათ
ბოტსვანა	50-60 000
ნამიბია	33 000
ანგოლა	8000
ობჟათე აფრიკაშ რესპუბლიკა	7500
ზამბია	1500
ზიმბაბვე	500
ნინეფი	შხვადოშხვა კოისანური ნინეფი
რელიგიეფი	ტრადიციული რელიგიეფი, ქირსიანობა
მოჯგირე ეთნიკური ბუნეფი	ჰოტენტოტეფი

ბუშმენეფი შქვინდით დო ლაბანამი ისინდეფით ჸვილჷნა ნოტყელეფს. ბოშეფს მაჯინეთ წვრართჷნა. მაბოშიას ოსურ ვამაჸონინე, ვინდარო კაბეტ ჩხოლარს ვემინადირენსჷნ. ბუნაშ შხვა მაკათურეფი, ჯინჯეფს, კანკარს, თხირს დო შხვადოშხვა ჩანარეფიშ თასის შაყარანა.

გეგიალა

ოშუმალ-ოშკომალიშ მაპალარო ბუნა შხირას ოხვილუ ოხორუე აბანიშ თირუას. ჩჷქჷჩქუეფი პუხუშა მობუნაფილი ტომარეფით გილმაჸუნა, წყარი გილუღჷნა სირაქლემაშ მარქვალიშ ხეჭით. თინეფიშ ოპალუე ქექე დო ლექინას გინაღალარი რე. კანკალე გვერდოწირეშ ფორმაშ დუდმიკაფორუს აკმაგანა ნოჸელეფშე დო ოდიარეშე დო თინეფს მარეფიშ გოძვენას მითახორანა.

სერსერობათ შხირას ურჩქილენა მოხუცებულეფიშით ნარაგადუ ამბეეფს.

ბუშმენეფიშ ისტორია

ბუშმენეფი, ალბეთ, ობჟათე აფრიკაშ პირველი მახორუეფი რდეს დო შილებე 20 000 წანაშე უმოსი რე თაქ ოხორანა. მეგორაფილი რე თინეფიშ წიმოხონეფიშ კირდეშ ხანტურუაშა, ნამუთ მუსხირენ ვითოშ წანაშ უწმოხიანი რე.

ლიტერატურა

• ქორთული სხუნუეფიშ ენციკლოპედია, ტ. 2, ხს. 593, ქართი, 1977 წანა.