გიმიშღვერე

გიმიშღვერე (ლათ. Cuscuta) — ართწანიანი ჟვერი ჩანარეფიშ გვარი გიმიშღვერეშობურეფიშ ფანიაშე. ჯინჯი დო ნანდული ფურცელი გიმიშღვერეს ვაუღუ. მინჯეჩანარს ეიარწკიპუ კარკატია ღერს დვალირი მიოწუალეფით დო თიშ ხარჯიშა ჭკომუნს. ჩანარიშ პიოლი ჭიფე, ვარდიშფერი ვარდა ჩე რე. თასი ღვიღვინაფაშ უნარს ისქილიდუანს 3-10 წანაშახ. გიმიშღვერე დახე ედომუშამ დიხაუჩას რე გოფაჩილი. ეიოშანალი რე საქორთუოს ფართოთ გოფაჩილი ევროპული გიმიშღვერე (Cuscuta europaea), ამერიკული გიმიშღვერე (Cuscuta arvensis), სუმჸუჯიშ გიმიშღვერე (Cuscuta epithymum), ზაფანაშ გიმიშღვერე (Cuscuta obtusiflora). მანე დო საკარანტინე ჩანარი რე. აგავალენს სუმჸუჯის, ანჯას, სელს, ზაფანას, თუთმს, კარტოფილს, ჭაკუნტელს, ხანჭკის, ხვარხვის დო შხვა ჩანარს. მუთმოფხვადჷნა ჟვერ ჩანარეფსჷთ. გიმიშღვერეშ კანკალე გვარობა ლაბანამი რე დო ოჭკომალს მოხვამილაფაშ შვანს შილებე მოწამალუას ჩხოლარი.

ეშაჸოთამაშ საშუალებეფი: ოთასე მასალაშ წიმინდუა, ჟვერეთ ულირი ნოკვეთიშ ცალუა გიმიშღვერეშ თასიშ მიშულაშახ დო ნაცალაშ ჭუალა, გინობარუა, გინოხონუა, ჰერბიციდეფით წამალუა.

ლიტერატურა

• ქეშელაშვილი გ., ქორთული სხუნუეფიშ ენციკლოპედია, ტ. 1, ხს. 34, ქართი, 1975 წანა.