გრიპი

გრიპი (ინგლ. Influenza, ბერძენ. Γρίππη) — შუროღალი შარეფიშ წვავე ინფექციური ლახარა, ნამუსჷთ იწვენს ვირუსი Orthomyxoviridae ფანიაშე. პერიოდულო იფაჩუ მუჭოთ ენდემია დო პანდემია.

გრიპი
გრიპიშ ვირუსიშ მიკოსურათი, ნამუთ გჷნოღალირი რე ელექტრონულო გჷმანათე მიკროსკოპით დო ნამუთ ადიდენს დოხოლაფირო 100 ვითოშშახ
ICD-10	J10.{{{3}}}, J11.{{{3}}}
ICD-9	487
DiseasesDB	6791
MedlinePlus	000080
eMedicine	med/1170  ped/3006
MeSH	D007251

არსებენს გრიპიშ ვირუსიშ 3 ტიპი: A, B დო C. სუმხოლო ტიპიშ ვირუსის შეულებუ დაინფიცირას ადამიერი, მარა B დო C ტიპეფი ვეგმიწვიენა გრიპიშ პანდემიას.

A ტიპიშ გრიპი ირთუ შხვადოშხვა გიმენტიპეფო, ნამუთ ალახენა მუჭოთ ადამიერს, თაშნეშე შხვადოშხვა ხერხემალიან ჩხოლარეფს: ფურინჯეფს, ღეჯეფს, ცხენეფს, ვეშაპეფს, სელაპეფს დო შხვა. ბორჯგიშაშქუმალირო გრიპიშ ვირუსი მალას იფაჩუ, აკანი უღუ გვარობაშ დინოხოლე ინფექციაშ აფეთქებას, პანდემიაშ გოვითარაფას დო ლეტალობას. მუტანტი შტამეფიშ წჷმოქიმინუაშ ბორჯის, გრიპიშ ვირუსი იკათუანს შხვა გვარობაშ ორგანიზმეფშა გოფაჩუაშ უნარს. ეკონია დეკადას თეშ სამანგა რდჷ ფურინჯიშ გრიპიშ დო ღეჯიშ გრიპიშ ეპიდემიური გოფაჩუა ადამიერეფს.

A ტიპიშ გრიპიშ ვირუსეფიშ ჟინპიჯის ჟირი სპეციფიური პროტეინი არსებენს: ჰემაგლუტინინი (H) დო ნეირამინიდაზა (N). "H" დო "N" პროტეინულიშ აკოდგინალუა გჷთმოთანჯუნს ვირუსიშ შტამიშ კლასიფიკაციას: სამანგ. 2006 წანაშ ფურინჯიშ გრიპიშ ეპიდემიაშ გჷმმაჭანალი რდჷ H5N1, 2009 წანაშ ღეჯიშ გრიპიშ ეპიდემიაშ - H1N1.