ზენობია (პალმირა)
სეპტიმია ზენობია (პალმირული არამეული 𐡡𐡶𐡦𐡡𐡩; დ. დოხოლაფირო 240 — ღ. დოხ. 274) — პალმირაშ იმპერიაშ დიაფალი 267-272 წანეფს.
| ზენობია 𐡡𐡶𐡦𐡡𐡩 | ||
.png) ანტონინიანი ზენობიაშ გჷმოხანტუათ | ||
| პალმირაშ დიაფალი | ||
|---|---|---|
| პოსტის გერინაშ ბორჯი | ||
| 267 – 272 | ||
| დუნაბადი | დოხ. 240 პალმირა, სირია | |
| ნაღურა | დოხ. 274 | |
| ალმასქუ | ოდენატე | |
| სქუალეფი | ვაბალატე ჰაირან II სეპტიმიუს ანტიოქე (?) | |
ზენობიაშ ქომონჯი რდჷ ოდენატე, ნამუთ რომიშ პროვინცია პალმირაშ მამართალი რდჷ. ოდენატე აწარმენდჷ წჷმოძინელი ოურდუმე კამპანიას სპარსალეფიშ მეხჷ. თიქ, 267 წანაშო სპარსალეფიშე გადუდიშულჷ რომიშ იმპერიაშ ბჟაეიოლი პროვინციეფი. 268 წანას (შხვა ვერსიათ 267 წანას) ოდენატე დო თიში უნჩაში სქუა ჰეროდე (ჰეროდიანე) დოჸვილეს. უკულ, ზენობიაქ გინირთჷ უკულაში ქომოლსქუაშ ვაბალატეშ რეგენტო. ზენობია პოლიტიკურო რომს ვამორჩილუდჷ. თიქ გაფართინუ მუში ხეშულობა, 269 წანას ქიდეკინჷ ეგვიპტე, უკულ ქიდიჸუნუ მორჩილი აზია დო რომიშ იმპერიაშე ზოხორინელობა გეგმაცხადჷ. რომიშ იმპერატორქ, ავრელიანექ მანწყუ ოურდუმე კამპანია ზენობიაშ მეხჷ დო ზენობიაშ აკოანჯარაფილი ნძალეფი დამარცხჷ დიო ანტიოქიშ (თეხანური ანთაქია, თურქეთი) გოხოლუას დო უკულ ემესაშ (თეხანური ჰომსი, სირია) ლჷმას. ზენობიაქ დო ვაბალატექ ინტეს, მარა რომალეფქ ქეკათხოზეს დო ჟირხოლო ოჭოფეს. 273 წანას პალმირალეფქ კინ ეარყეს, მარა რომალეფქ კინ ახალშო გემშეჭკირეს დო პალმირა მოჯალაგეს. ზენობიაშ უკულიანი ბედი უჩინებუე. ართი ვერსიათ თინა რომშა გეგნახორეს, სოდეთ დოხოლაფირო 274 წანაშო დოღურე.
ახალნორდობას ზენობიას ჯგირი გონათაფა მეუღებუ. თინა ჸოფე კულტურული დო ინტელექტუალი მონარქი, ნამუთ ხეს უნწყუნდჷ მენცარობაშ გოვითარაფას, თხილანდჷ რელიგიური უჭიჭაშობეფიშ ნებეფს. ზენობია ხემანჯღვერენდჷ სტაბილური ადმინისტრაციას, ნამუთ წჷმოძინელო მართუნდჷ მულტიკულტურული დო მულტიეთნიკური იმპერიას. ზენობიაშ ღურაშ უკულ, თიში ცხოვრებათ დეინტერესეს შხვადოშხვა ისტორიკოსეფქ დო ჭარუეფქ. თინა პატრიოტიზმიშ სიმბოლოთ რე მერჩქინელი თეხანური სირიას.