ზენონი (ბიზანტია)
ზენონი (ლათ. Flavius Zeno, ბერძ. Ζήνων, დ. დოხოლაფირო 425 — ღ. 9 პირელი, 491), დაბადებაშ ჯოხო ტარასიკოდისა — ბჟაეიოლი რომიშ იმპერატორი 474-475 დო 476-491 წანეფს, ლეონიდეფიშ დინასტიაშ წჷმმარინაფალი.
| ზენონი ლათ. Flavius Zeno ბერძ. Ζήνων | ||
 ზენონიშ სემისი | ||
| ბჟაეიოლი რომიშ იმპერატორი | ||
|---|---|---|
| პოსტის გერინაშ ბორჯი | ||
| 29 ღურთუთა, 474 – 9 ღურთუთა, 475 | ||
| წიმოხონი | ლეონ II | |
| მონძე | ბასილისკოსი | |
| პოსტის გერინაშ ბორჯი | ||
| მარაშინათუთა, 476 – 9 პირელი, 491 | ||
| წიმოხონი | ბასილისკოსი | |
| მონძე | ანასტასიოს I | |
| დუნაბადი | დოხოლაფირო 425 რუსუმბლადა, ისავრია, კილიკია | |
| ნაღურა | 9 პირელი, 491 (65 წანერი) კონსტანტინოპოლი, ბიზანტიაშ იმპერია | |
| მუმა | კოდისა | |
| ნანა | ლალისი | |
| ალმასქუ | არკადია არიადნა | |
| სქუალეფი | ზენონი (არკადიაშე) ლეონ II (არიადნაშე) | |
| რელიგია | ქირსიანობა | |
ზენონქ პოპულარობა მიპალუ ოურდუმე საქვარეფით. რდჷ მანჯღვერთარი ისავრიალეფიშ არმიაშ, ნამუსჷთ სერიოზული შანულობა უღუდჷ ბიზანტიაშ იმპერიაშო. 466 (ვარდა 467) წანას ზენონქ ოსურო ქიმიჸონჷ იმპერატორიშ ლეონ I-შ ცირასქუა არიადნა. 469 წანას გიშაგორილქ იჸუ კონსულო. 474 წანას დოღურჷ ლეონ I-ქ. ღურაშახ თიქ მონძეთ გეგმაცხადჷ მუში შკვითი წანერი მოთა, ზენონიშ სკუა ლეონ II. ლეონ II-ქ მალას დოღურჷ დო იმპერატორო ზენონქ გინირთჷ.
ზენონქ მიოჭირინუ თინჩალას ვანდალეფიწკჷმა, ნამუეფით აფრიკას ოხორანდეს. იმპერიაშ დინახალე ზენონს მალას პრობლემეფქ ქაშუ. ისავრიალი ილუსიქ ზენონიშ მეხჷ მანწყუ არყება. ზენონი გეგნარინეს დო ისავრიაშა ონტინეს. იმპერატორო გინირთჷ ბასილისკოსიქ, ნამუთ ლეონ I-შ ოხოლასქირი რდჷ. ბასილისკოსი იმპერიას მართუნდჷ დოხოლაფირო ეჩი თუთაშ გოძვენას. თიში რელიგიური რეფორმეფს პოპულარობაქ ვეიაჭოფუ. 476 წანაშ მარაშინათუთას, ზენონქ მუში მოხუჯეეფით კონსტანტინოპოლიშა გემშართჷ დო ხვისტა დირთინუ. 484 წანას ზენონიშ მეხჷ ეარყჷ ილუსიქ, ნამუსჷთ სერიოზული გოლინა უღუდჷ იმპერიაშ მასშტაბით. ილუსიქ დემარცხჷ მარა 488 წანაშახ იშენი აგინძორენდჷ ლჷმას ზენონიშ მეხჷ. 488 წანას ილუსი ოჭოფეს დო დუდი მეკვათეს. ჸათე ბორჯიშ პერიოდის, ზენონი ოცადუდჷ ოსტგოთეფიშ პრობლემაშ გინოჭყვადუას. იმპერიაშო სერიოზული პრობლემას წჷმარინუანდჷ თინეფიშ მანჯღვერი თეოდორიხი. 489 წანას ზენონქ თეოდორიხის იტალია გეგნოჩჷ. ჸათე გინოჭყვიდირით ზენონქ დეთხინუ თეოდორიხი იმპერიაშ სანძღოეფიშე. თეოდორიხიქ უკულ იტალიაშა გემშეჭკირჷ, გეგთარაგუ დო დოჸვილჷ ოდოაკრი.
ზენონი, მართუალაშ ბორჯის ოცადუდჷ რელიგიური ართოიანობაშ მეჭირინაფას დიოფიზიტეფს დო მონოფიზიტეფს შქას. მარა თიში ცადებეფს სერიოზული წჷმოძინეფი ვამუღალუ. ზენონქ ღურუ 491 წანაშ 9 პირელს დიზენტერიათ (შხვა ვერსიათ ეპილეფსიათ). არიადნაშ ალარინათ ხვისტაშა ეშართჷ ანასტასიოს I-ქ, ნამუშ მეხჷ ეარყჷ ზენონიშ ჯიმაქ ლონგინუსიქ. ჸათე არყებათ ბიზანტიას ქიდიჭყჷ ისავრიალეფიშ ლჷმაქ, ნამუქჷთ 497 წანაშახ გეგინძორჷ.