კარლ გუსტავ ემილ მანერჰეიმი
ბარონი კარლ გუსტავ ემილ მანერჰეიმი (შვედ. დო ფინ. Carl Gustaf Emil Mannerheim; დ. 4 მანგი, 1867 — ღ. 27 ღურთუთა, 1951) — ფინარი ოურდუმე დო სახენწჷფო მოღალე, ჩე გვარდიაშ ლიდერი ფინეთიშ ომენოღალე ლჷმაშ პერიოდის (1918), ფინეთიშ რეგენტი 1918-1919 წანეფს, ფინეთიშ აკოანჯარაფილი ნძალეფიშ მანჯღვერთარი მაჟირა მოსოფელიშ ლჷმაშ ბორჯის (1939-1945), ფინეთიშ მაამშვა პრეზიდენტი 1944-1946 წანეფს, ფინეთიშ ფილდ-მარშალი 1933 წანაშე დო ფინეთიშ საპატიო მარშალი 1942 წანაშე.
| კარლ გუსტავ ემილ მანერჰეიმი ფინ. Carl Gustaf Emil Mannerheim | ||
 მანერჰეიმი 1940 წანას | ||
| ფინეთიშ მაამშვა პრეზიდენტი | ||
|---|---|---|
| პოსტის გერინაშ ბორჯი | ||
| 4 მარაშინათუთა, 1944 – 4 მელახი, 1946 | ||
| პრემიერ-მინისტრი | ანტი ჰაკცელი ურჰო კასტრენი იუჰო კუსტი პაასიკივი | |
| წიმოხონი | რისტო რიუტი | |
| მონძე | იუჰო კუსტი პაასიკივი | |
| პოსტის გერინაშ ბორჯი | ||
| 12 ქირსეთუთა, 1918 – 26 კვირკვე, 1919 | ||
| წიმოხონი | პერ ევინდ სვინჰუვუდი | |
| მონძე | კარლო იუჰო სტოლბერგი | |
| დუნაბადი | 4 მანგი, 1867 ასკაინენი, ფინეთიშ დიდი სათარო, რუსეთიშ იმპერია | |
| ნაღურა | ღურთუთა 27, 1951 (83 წანერი) ლოზანა, შვეიცარია | |
| ნთხორუ აბანი | ჰიეტანიემიშ სასაფლა, ჰელსინკი, ფინეთი | |
| მუმა | კარლ რობერტ მანერჰეიმი | |
| ნანა | ჰედვიგ ფონ იულინი | |
| ალმასქუ | ანასტასია არაპოვა | |
| სქუალეფი | ანასტასია მანერჰეიმი (1893–1978) სოფია მანერჰეიმი (1895–1963) | |
| ხეშმოჭარუა |  | |
მანერჰეიმი გურაფულენდჷ ჰამინაშ კადეტეფიშ სკოლას, სივრეშეთ 1886 წანას გეგშაჸათეს. 1887-1889 წანეფს გურაფლენდჷ სანქტ-პეტერბურგიშ კავალერიაშ კოლეჯის. 1891 წანას ქაკათჷ მონკა კავალერიაშ გვარდიული პოლკის. მანერჰეიმი ნინალენდჷ რუსეთიშ იმპერიაშ არმიას 1917 წანაშახ. მონაწილენდჷ რუსეთ-იაპონიაშ ლჷმას დო მაართა მოსოფელიშ ლჷმას. 1917 წანას მიპალუ გენერალ-ლეიტენანტიშ ჩინი. მანერჰეიმი ჯგირო იჩინენდჷ რუსეთიშ იმპერატორს ნიკოლოზ II-ს დო თის ბრელშა შეხვალამუ. 1917 წანაშ გჷმათუთაშ რევოლუციაშ უკულ, ფინეთიქ ზოხორინელობა გეგმაცხადჷ. მალას, 1918 წანას ფინეთის ქიდიჭყჷ ომენოღალე ლჷმაქ, სოდეთ ართიანს ოლიმუდეს პრო-ბოლშევიკური ჭითეფი დო ჩეეფი. ჩეეფი წჷმარინუანდეს ფინეთიშ სენატიშ არმიას. თინეფს ალურდჷ დო ოხვარუდჷ გერმანიაშ იმპერია.
1918 წანაშ ღურთუთას, ფინარეფქ ჩეეფიშ მანჯღვერთარო გეგშაგორეს მანერჰეიმი, ნამუქჷთ მალას ოურდუმე წჷმოძინეფს დო გომორძგუეფს მიოჭირინუ. მანერჰეიმიშ ხემანჯღვერობათ ჰელსინკის იტარინჷ გომორძგუაშ აღლუმქ. ართი პერიოდის მანერჰეიმიქ ფინეთი ქიდიტუ დო ოცხოვრებუშა ურცხოეთიშა მიდართჷ. ფინარეფქ მანერჰეიმი ფინეთიშა ქიმიჭანეს დო ქუდარინეს ფინეთიშ მაჟირა რეგენტო (სახენწჷფოშ მადუდე). ჸათე პოსტის მანერჰეიმი 1918 წანაშ ქირსეთუთაშე 1919 წანაშ კვირკვეშახ ნინალენდჷ. მანერჰეიმი მონაწილენდჷ ფინეთიშ 1919 წანაშ საპრეზიდენტო გიშაგორუეფს მარა კარლო იუჰო სტოლბერგიწკჷმა წაგუ. ჸათე მარცხიშ უკულ მანერჰეიმიქ პოლიტიკა ქიმიოტუ. 1922 წანაშე ნინალენდჷ ფინეთიშ ჭითა ჯვარიშ ხემანჯღვერო. ჸათე პოსტი თის ღურაშახ უკინებუდჷ. 1930-იან წანეფიშე კინ პოლიტიკას დართჷ. 1931 წანას ფინეთიშ პრეზიდენტიქ პერ ევინდ სვინჰუვუდიქ მანერჰეიმი ქუდარინუ დუდთხილუაშ სხუნუშ მადუდეთ. სხუნუშ ღანკი რდჷ მზადება სსრრ-წკჷმა პოტენციური კონფლიქტიშო.
1939 წანას ქიდიჭყჷ ზოთონჯიშ ლჷმაქ. ფინეთიშ აკოანჯარაფილი ნძალეფიშ მანჯღვერთარო გინირთჷ მანერჰეიმიქ. ჸათე პოსტი თის უკინებუდჷ გეჸვენჯი ხუთი წანაშ გოძვენას. მანერჰეიმიქ გინირთჷ ფინეთიშ აკმაართიანაფალი სიმბოლოთ. სსრრ-წკჷმა ლჷმათ ფინეთიქ მიოდინუ ტერიტორიაშ დოხოლაფირო ვითი პროცენტი მარა რსულას ოკუპაციას გინასქიდჷ. 1941 წანას, მანერჰეიმი პერსონალურო მონაწილენდჷ ოპერაცია ბარბაროსაშ მზადებას. 1944 წანას, მუჟამშოთ ნაცისტური გერმანია ლჷმას წუთმაგენდჷ, ფინეთიშ პარლამენტიქ მანერჰეიმი ქუდარინუ ფინეთიშ პრეზიდენტო. თიში ხემანჯღვერობათ ფინეთი აწარმენდჷ ოთინჩალე მორაგადაფას სსრრ-წკჷმა დო გოართოიანაფილი ომაფეწკჷმა.
1940-იან წანეფიშე მანერჰეიმიშ სინთელექ დედაღარჷ დო ძალამს გეუარეს. 1946 წანას მანერჰეიმიქ პრეზიდენტიშ პოსტიშე გეგნოდირთჷ დო ომკურნალებუშა შვეიცარიაშა მიდართჷ. ეკონია პერიოის ჭარუნდჷ მემუარეფს. ღურუ 1951 წანაშ 27 ღურთუთას, 83 წანერქ. კარლ გუსტავ ემილ მანერჰეიმი მერჩქინელი რე ართ-ართ უდიდაში ფინარო. თის თეხანური ფინეთიშ მუმას ხოლო უძახუნა.