კორცხელი

კორცხელი – ოფუტე საქორთუოს, სამარგალო-ჟიმოლენი შონეშ აკანიშ ზუგდიდიშ მუნიციპალიტეტის, ოდიშიშ დჷკის. ზუგდიდ –წალენჯიხაშ ოავტომობილე შარას, ზუღაშ დონეშე 200 მეტრა, ზუგდიდიშე 10 კმ, 2014 წანაშ ეჭარუაშ მუნაჩემეფით ოფუტეს ოხორანს 883 ადამიერი.

ისტორია

ოფუტე კორცხელი ისტორიულ წყუეფს მაართათ მოშინაფილიე XVII ოშწანურას. კორცხელს რე XVII ოშწანურაშ ქორთული ხუროთმოძღვრული ძეგლი – ნანაღორონთიშ ოხვამე. ჭარილი საბუთეფიშ ალებათ თინა 1624 –1639 წანეფს ეუგაფ ოდიშიშ თარს ლევან II დადიანს. 1815 წანას ოხვამე აკანწყუაფუ ნიკოლოზ დადიანქ. 1859 წანას კინეშე გაახალეს.