ლუი IX
ლუი IX, თაშნეშე შინელი რე მუჭოთ ჯეგე ლუი (ფრანგ. Louis IX, დ. 25 პირელი, 1214 — ღ. 25 მარაშინათუთა, 1270) — საფრანგეთიშ მაფა 1226-1270 წანეფს, კაპეტინგეფიშ დინასტიაშ წჷმმარინაფალი, ლუი VIII-შ დო თიში ალმასქუ ბლანკა კასტილიარიშ ქომოლსქუა. მუამუშიშ ღურაშ უკულ ვითოჟირი წანერი ლუი მაფათ აკურთხეს რეიმსის. რსულწანობაშ მეჭირინაფაშახ თიში რეგენტი დო საფრანგეთიშ ომაფეშ რეალური მამართალი რდჷ ლუიშ დიდა ბლანკა.
| ლუი IX ფრანგ. Louis IX | ||
 | ||
| საფრანგეთიშ მაფა | ||
|---|---|---|
| პოსტის გერინაშ ბორჯი | ||
| 8 გერგობათუთა, 1226 – 25 მარაშინათუთა, 1270 | ||
| წიმოხონი | ლუი VIII | |
| მონძე | ფილიპ III | |
| დუნაბადი | 25 პირელი, 1214 პუასი, საფრანგეთი | |
| ნაღურა | 25 მარაშინათუთა, 1270 (56 წანერი) ტუნისი, ოორუე აფრიკა | |
| ნთხორუ აბანი | სენ-დენიშ ბაზილიკა დო მონრეალეშ ოკათედრე ოხიდა | |
| მუმა | ლუი VIII | |
| ნანა | ბლანკა კასტილიარი | |
| ალმასქუ | მარგარიტა პროვანსალი | |
| სქუალეფი | ბლანკა, იზაბელა, ლუი, ფილიპ III, ჟანი, ჟან ტრისტანი, პიერ I, ბლანკა, მარგარიტა, რობერი, აგნესა | |
| რელიგია | კათოლიციზმი | |
მართუალაშ ბორჯის ლუი IX-ს კონფლიქტური ურთიართალა უღუდჷ დიდებუანეფიწკჷმა, მაგალითო ჰუგო X დე ლუზინიანი დო პიერ I-წკჷმა, ნამუეფით მაფას ვამორჩილუდეს. დოხოლაფირო ჸათე პერიოდიშოთ, ინგლისიშ მაფა ჰენრი III ოცადუდჷ ჸოფილი ანჟუშ იმპერიაშ ჸეთი ტერიტორიეფიშ დორთინაფას, ნამუეფით ინგლისიქ მუამუშიშ ჯონ უდიხაწყარეშ მართუალაშ ბორჯის მიოდინუ. 1242 წანაშ 21-22 კვირკვეშ ტაილბურგიშ ლჷმას, ფრანგეფქ კონწარო დამარცხეს ინგლისარეფი. ლუი IX გაფართინუ საფრანგეთიშ გაულა, ქიდეკინჷ აკვიტანიაშ შანულამი ნორთი, თაშნეშე მენი დო პროვანსი. ლუი IX ხემანჯღვერენდჷ მაშკვითა დო მაბრუო ჯვაროსნული ლესქერობეფს, ნამუეფსჷთ მუთუნნერი წჷმოძინეფი ვამუღალუ. 1250 წანას, აიუბიდეფქ დამარცხეს ჯვაროსანეფი დო ტყვეთ ხეშა ქაშეჸოთეს ლუი IX, ნამუთ დიდი მუდანობათ ოგაფურიშ მეღებაშ უკულ გადუდიშულეს.
1270 წანას ლუი IX-ქ მუსულმანეფიშ მეხჷ წიმიჭყჷ მაბრუო ჯვაროსნული ლესქერობა. ჯვაროსანეფი ლჷმეფს აწარმენდეს ტუნისიშ მამართალი ჰაფსიდეფიშ მეხჷ. კონფლიქტიშ მიმალობას ლუიქ დიზენტერიათ ქიდელახჷ დო დოღურჷ. უკულ ჯვაროსანეფქ დო ჰაფსიდეფქ ხე ქუმაჭარეს ოთინჩალე ხეკულუას. ლესქერობაქ თეშ გეთუ, ჯვაროსანეფს მუთუნნერი გომორძგუაშა ვემუჭირინუაფუნა დო უკულ ევროპაშა დირთეს.
მართუალაშ ბორჯის, ლუი IX-ქ ატარჷ შხვადოშხვა რეფორმეფი, დოკონჩჷ გოლინიანი დიდებუანეფიშ ნებეფი, პარიზის დარსხუ უმაღალაში სასამართალო პალატა, გაუქვჷ ორდალია. ლუი რდჷ კათოლიკური ეკლესიაშ ალმარენჯი დო უღუდჷ შანულამი ავტორიტეტი ქირსიანული ოქიანუს.