მაიკ ტაისონი
მაიკლ ჯერალდ „მაიკ“ ტაისონი (ინგლ. Michael Gerard Tyson; დ. 30 მანგი, 1966, ბრაუნსვილი, ბრუკლინი, ნიუ-იორკი, ააშ) — ამერიკალი პროფესიონალი მოლიკვე. ისტორიას ართ-ართი არძაშე ჩინებული დო ჯოხოგოლაფირი მოლიკვე. მოსოფელიშ ჩემპიონი სუპერმონკა წონათ კატეგორიას WBC ვერსიათ (1986-90, 1995-96), მოსოფელიშ აბსოლუტური ჩემპიონი პროფესიონალეფს შქას (1987-90). ამერიკული ჟურნალქ „Ring“, არძა ბორჯიშ დო კათაშ მა-14 უკაბეტაში მონკა წონაშ მოლიკვეთ გჷმაცხადუ. მოსოფელიშ ჩემპიონიშ ტიტულიშ გეშა მონკა წონაშ კატეგორიას გიორჯგინ 11 მოლიკვეს. არძაშე მაღალგინოგაფური მოლიკვე ისტორიას (ფლოიდ მეივეზერშახ).
ანდა მოსოფელიშ რეკორდიშ მაპალუ რე, ნამუეფჷთ ათე ბორჯიშა ვამონწყუმე: არძაშე ახალნორდი მოსოფელიშ ჩემპიონი მონკა წონაშ კატეგორიას (20 წანერი დო 144 დღერი); არძაშე ახალნორდი მოსოფელიშ აბსოლუტური ჩემპიონი (21 წანერობას); მოლიკვე, ნამუქჷთ არძაშე ნარკი ბორჯი იკორინუ დებიუტიშ მომენტიშე ჩემიონიშ ტიტულეფიშ მაპალაფარო დო მოსოფელიშ აბსოლუტური ჩემპოიონობაშო მონკა წონაშ კატეგორიას (1 წანა 8,5 თუთა დო 2 წანა დო 5 თუთა ომანგეთი); პირველი დო აკა აბსოლუტური ჩემპიონი, ნამუქჷთ დეინალჷ სუმი თარი ტიტული ართიანიშ მეჸუნელო; ისტორიას არძაშე მაღაგინოგაფური მონკა წონაშ მოლიკვე; აკა რე, ნამუქთ დოთხილუ აბსოლუტური ჩემპიონიშ ტიტულინ (WBC, WBA, IBF) 6-შა ართიანიშ მეჸუნელო; არძაშე ბიწორი ნოკაუტეფიშ არძაშე უმოსი მუდანობა (9 ნოკაუტი 1 წუთშე მერკე ბორჯის); არძაშე ბიწორი ნოკაუტი ახალნორდულ ოლიმპიურ ლაჸაფეფს (8 წამი).
„რკინაშ მაიკის“ იშენით ვეშალებუ მუში პოტენციალიშ რსულას რეალიზაცია. თიში მაწვართალი კასა დ'ამატოშ ღურაშ უკული, მაიკიქ მორალურო მოტირხჷ. თიში მარცხება „ბასტერ“ დაგლასიშით 1990 წანას, ასეშა იკოროცხუ ლიკვუაშ ისტორიას უკაბეტაში სენსაციათ. კჷნი მუ ტაისონქ აღიარჷ, ნამჷ-და თიში კარიერაქ ლიკვუას დუგლასწკჷმა მარცხებათ გეთჷნ. „ჩქიმო ლიკვუაქ თეშ უკული უბრალოთ ფარაშ შიბაშ მეშქაშობათ გჷნირთუ დო მეტი მუთუნ ვარი“ - თქჷ ტაისონქ. თიშ უკული ტაისონს ბრელი გლახა მუდგაინქ მოხვადჷ, სუმშა ხვილიშას ქუმოხვადჷ დო რსულას გეშალჷ ფორმაშე. მარა თიში რინას ქუმოხვადჷ თიჯგურა მუდგაინქ, ნამუქჷთ თის რინაშ ხიოლი დურთინჷ დო ირფელიშ უმკუჯინალო მაიკიქ ნარდიშულა კჷნ ქიდიჭყჷ.
სუმშა ხედჷ ხვილიშას. 1992 წანას (გაუპატიურებაშო მესაჯებული აფუდჷ 6 წანა, ნამუეფშე ხედჷ 3 წანას), 1998 წანას (თი ადამიერეფიშ ლახუაშენ, ნამუეფქჷთ თიში მანქანას არაგვესჷნ; მესაჯებული აფუდჷ 3,5 თუთათ დუდიშულაშ მოვარება) დო 2008 წანას (1 დღა დო სერით ხედჷ ნარკოტიკეფიშ ხვარებაშენ დო ნარკოტიკული შუმაფაშ დგომარობათ მანქანას გეხუნაშენ). თაშნეშე ახალნორალას ხედჷ ბაღანეფიშ კოლონიას. იგურგინჷ სუმშა. ბრუო ბაღანაშ მუმა. 2009 წანას, ტრაგიკულო დოღურჷ თიში ოთხი წანერი ცირასქუაქ. ისლამიშ გემაჸვენჯი რე დო უღჷ არაბული ჯოხო მალიქ აბდულ აზიზი (ინგლ. Malik Abdul Aziz). რე ვეგანი.
პრომოუტერული კომპანია Iron Mike Promotions-იშ დჷმარსხუაფალი. ლიკვუაშ მოხჷ, მაიკი ჩინებული რე მუში არტისტული კარიერათ. ოკათუდჷ ავტობიოგრაფიული ფილმიშ „ტაისონი“ (1994) სცენარიშ ჭარუას, გინოღალირი რე ჟირი დოკუმეტური ფილმს „დიდებაშ მაჟირაჸურე“ (2003) დო „მაიკ ტაისონი“ (2009). 2016 წანას, ართ-ართი თარი როლი ილაყაფჷ ფილმს „იპ მანი 3“. მეტჯოხო — „რკინაშ მაიკი“.
რესურსეფი ინტერნეტის
რედაქტირაფა
|
თე სტატია პიჯიშ გეშა დიოდღარო მერკე რე. თქვა შეგილებუნა ქუმმეხვარათ დო აკაფშათ თინა. |